Վանաձորում գործող Լոռիճանշին ճանապարհաշինական ընկերության աշխատակիցները բողոքում են. ընկերությունը դեռեւս 2016 թվականից կուտակված աշխատավարձի պարտքերը չի մարում:
Ընկերության աշխատակիցների խոսքով «Լոռիճանշինը» աշխատավարձի պարտք ունի ընկերության շուրջ 50 աշխատակցի: Պարտքի ընդհանուր թիվը կազմում է 7-8 մլն դրամ:
Աշխատողները նշում են, որ շուրջ մեկ տարի է, «Լոռիճանշինը» գրեթե չի աշխատում ու իրենք զրկված են ոչ միայն աշխատելու, այլ վաստակած գումարն ստանալու հնարավորությունից:
«Ամեն անգամ խոստանում են, որ կտան, բայց առ այսօր սայլը տեղից չի շարժվում: Հետ առաջ, հետ առաջ: Չէ, չեն ասում, հա-ի մեջ էլ գոլ չկա»,- NEWS.am-ի թղթակցի հետ զրույցում դժգոհեց ընկերության աշխատակից Լեւոն Մկոյանը: Վերջինիս ընկերությունը պարտք է շուրջ 300.000 դրամ:
Աշխատակիցները դժգոհում են՝ այլեւս չեն կարողանում գոյատեւել, ստիպված են լինում անընդհատ վարկ վերցնել՝ ամենօրյա կեցության հարցերը հոգալու համար:
Այժմ, սակայն, երբ վարկերը կուտակվել են ու այլեւս անհնար է դարձել ապրելը, ընկերության նախկին աշխատակիցներն չգիտեն ինչպես ապրել:
«Լոռիճանշին» ՓԲԸ-ից աշխատողների աշխատավարձերի վճարման պահանջին ի պատասխան հորդորում են՝ համբերատար լինել ու սպասել:
«Աշխատողների պարտքը քիչ-քիչ վճարում ենք: Աշխատում ենք պակասացնենք, քիչ-քիչ վճարենք»,- մեզ հետ զրույցի ժամանակ նշեց «Լոռիճանշին» ՓԲԸ-ի տնօրեն Արայիկ Վարդանյանը:
Վերջինս խոսքով բոլորից շատն ինքն է մտածում աշխատողների աշխատավարձերի պարտքը մարելու համար: Տնօրենի տեղեկացմամբ՝ աշխատավարձերի պարտքը կուտակվել է ընկերության պատվերների պակասելու հետևանքով: Թե երբ կկարողանան ամբողջությամբ մարել պարտքերը, տնօրենը դժվարանում է ասել:
«Մարդկանց ես խնդրել եմ ու խնդրում եմ, որ համբերեն, դիմանան»,- ասում է նա:
