2017 թվականին Հայաստանի ՔԿՀ-ներից 1748 դատապարտյալներ բուժման նպատակով տեղափոխվել են քաղաքացիական հիվանդանոցներ: Այս մասին հունվարի 19-ին հայտնեց ԱՆ ՔԿՎ իրավաբանական վարչության պետի տեղակալ, փոխգնդապետ Տիգրան Սահակյանը:
«Սա բացառիկ բան է եւ անցյալ տարիներին չի եղել»,- ընդգծեց Սահակյանը: Ինչ վերաբերում է ՔԿՀ-ներում մահացությանը, ապա Սահակյանը նշեց, որ 2017-ին Հայաստանի բանտերում 17 մարդ է մահացել, որոնցից հիվանդության պատճառով՝ 7-ը, գրանցվել է ինքնասպանության 2 դեպք: 2016-ին հիվանդության հետեւանքով մահացել է 7 դատապարտյալ, ընդամենը մահացել է 29-ը:
ՔԿՀ-ներում հասարակական դիտորդական խմբի անդամ Ռոբերտ Ռեւազյանն իր հերթին նշեց, որ դեպքեր կան, երբ բժշկական հանձնաժողովը եզրակացություն է տալիս, որ հիվանդությունը լուրջ վտանգ չի սպառնում, սակայն որոշ ժամանակ անց դատապարտյալը մահանում է: «Ինչի՞ մասին է սա խոսում: Թվում է, թե ՔԿՀ-ն անհրաժեշտ ամեն ինչ անում է: Սակայն խնդիրը կա: Հավանաբար, մեթոդը չի գործում, եւ ինչ-որ բան պետք է փոխել: Եթե պետությունը չի կարողանում դատապարտյալին բուժել, նրան պետք է ազատել: Օրինակ՝ եթե անհրաժեշտ է թանկարժեք վիրահատություն: Իսկ որոշ դեպքերում չեն ազատում, չնայած չեն էլ բուժում, եւ լռելյայն, համընդհանուր համաձյնությամբ հետեւում են մարդու մահվանը»,- նշեց Ռեւազյանը:
