Եզդիաբնակ Շամիրամ գյուղում 2017թ. ամռանը 4 հոգու սպանության մեջ մեղադրվող Թելման Քալաշյանի հորեղբորն առաջադրված մեղադրանքը մեղմ է: Այս մասին NEWS.am-ի հետ զրույցում ասաց Շամիրամի սգոհ սրահում սպանված Զորիկ Օզմանյանի եղբայրը՝ Մամե Օզմանյանը: Քյարամ Քալաշյանին մեղադրանք է առաջադրվել ՀՀ ՔՕ՝ 334-րդ հոդվածի 1-ին մասով: Նա մեղադրվում է սգո սրահից Թելման Քալաշյանի՝ փախուստի դիմելու հարցում օգնելու մեջ: Մամե Օզմանյանի խոսքով, Քյարամ Քալաշյանին առաջադրված մեղադրանքով 3 տարի ազատազրկում է սպառնում, որը շատ քիչ է մի մարդու համար, որը օժանդակել ու օգնել է փախչել մի մարդու, որը 4 հոգու կյանք է խլել եւ հրազենային վիրավորում հասցրել մի քանի հոգու:

«Մեկն աղջիկ է փախցնում երեք տարի նստեցնում են, հիմա իրան էլ ա էդ մեղադրանքով երեք տարի հասնում: Սա շատ քիչ է իր համար, մենք ավելին ենք պահանջում»,-ասաց նա:

Անցած տարվա օգոստոսի 1-ին Թելման Քալաշյանը Շամիրամ գյուղի գերեզմանատանը «Խեր» ազգային ծիսակատարության ժամանակ կրակ էր բացել այնտեղ գտնվողների վրա. սպանվել էին Ամրո, Աղասի եւ Զորիկ Օզմանյանները եւ Ամո Խուդոյանը: Ըստ մեղադրանքի՝ Թելման Քալաշյանին փախուստի դիմելու հարցում օգնել է նրա հորեղբայրը, ով դեպքի ժամանակ գտնվել է սգո սրահում: 

Թելման Քալաշյանին մեղադրանք է առաջադրվել՝ ՀՀ քրեական օրենսգրքի 104-րդ հոդվածի 2-րդ մասի 1-ին, 6-րդ կետերով, 213-րդ հոդվածի 2-րդ մասի 1-ին կետով, 235-րդ հոդվածի 1-ին մասով եւ 333-րդ հոդվածի 1-ին մասով, իսկ հորեղբորը՝ ՀՀ քրեական օրենսգրքի՝ 334-րդ հոդվածի 1-ին մասով: Նրանց նկատմամբ որպես խափանման միջոց է ընտրվել կալանավորումը:

Գործն ուղարկվել է  Արագածոտնի մարզի ընդհանուր իրավասության դատարան: