Մենք կասկած չունենք, որ տարբեր ինտեգրացիոն գործընթացների անդամակցելով կարելի է վստահորեն առաջ շարժվել: Այս մասին, այսօր՝ հունվարի 24-ին, ԵԽԽՎ-ում հարցուպատասխանի ժամանակ նշել է ՀՀ նախագահ Սերժ Սարգսյանը՝ անդրադառնալով փաստին, որ Հայաստանին հաջողվել է եւ լինել ԵՏՄ անդամ, եւ համագործակցության համաձայնագիր ստորագրել ԵՄ-ի հետ:
Սերժ Սարգսյանի խոսքով, 2009-2010 թվականներից Հայաստանը բանակցում է ԵՄ-ի հետ՝ նոր համաձայնագրի ստորագրման ուղղությամբ եւ այդ ժամանակաշրջանը համընկավ ԵՏՄ-ի հետ մեր բանակցությունների հետ:
«Եվ ԵՄ-ի եւ ԵՏՄ-ի պատասխանատուները շատ հստակ գիտեին, որ երկու երկու ինտեգրացիոն միավորումների հետ էլ ընթանում են բանակցություններ: Սկզբնական փուլում եւ մեկը, եւ մյուսը ողջունում էին մեր մոտեցումը: Բայց եկավ մի ժամանակ, երբ ԵՄ-ի մեր գործընկերները համարեցին, որ անհնար է համատեղել այդ երկու ինտեգրացիոն միավորումներում մասնակցությունը: Մենք ստիպված եղանք որոշում կայացնելու անդամակցել ԵՏՄ-ին, որովհետեւ Հայաստանի տնտեսությունը հազարավոր թելերով կապված է ԵՏՄ-ի տնտեսություններին: Մենք ունենինք բազմաթարյա հարաբերությունների պատմություն, բարեկամություն եւ ՀՀ քաղաքացիների ճնշող մեծամասնությունը՝ 80 տոկոսը, կողմնակից էր ԵՏՄ-ի անդամակցությանը»,-ընդգծեց ՀՀ նախագահը:
«Բայց պետք է ասեմ, որ ի պատիվ եվրոպական պաշտոնյաների, ժամանակը զգալի փոփոխություններ մտցրեց մտածելակերպում եւ արդեն Ռիգայի գագաթաժողովում որոշում կայացվեց տարբերակված մոտեցման: Որոշում կայացվեց, որ իրոք, հնարավոր է, համատեղել տարբեր ինտեգրացիոն կառույցներում մասնակցությունը:
Մենք սկսեցինք ինտենսիվ բանակցություններ եւ եկանք ճիշտ հանգրվանի, նոյեմբերի 24-ին համաձայնագիր ստորագրեցինք նաեւ ԵՄ-ի հետ»,-ընդգծեց ՀՀ նախագահը:
Սերժ Սարգսյանը կարծիք հայտնեց, որ այս երկու գործընթացները համատեղելու նախապայմանը շատ պարզ մի բան է՝ պետք է անկեղծ լինել գործընկերների հետ եւ չթաքցնել բանակցությունների ընթացքն ու պարտավորությունները:
«Եթե մի ինտեգրացիոն գործընթացներում ձեր պարտավորությունները չեն հակասում մեկ այլ փաստաթղթով ստանձնած պարտավորությունենրին, ապա ինչու չի կարելի համագործակցել: Մենք այդ փորձն ունենք նաեւ ՀԱՊԿ լիիրավ անդամ լինելով համագործակցելով նաեւ ՆԱՏՕ-ի հետ: Կարծում եմ, որ ապագայում սերտ համագործակցություն է լինելու ԵՏՄ-ի եւ ԵՄ-ի միջեւ: Ապագան այդ համագործակցությանն է: Այն խնդիրները, որ կան այսօր ու լինելու են վաղը, զարգացմանը չեն նպաստում, դրանք ռեսուրսներ են խլում, այդ ռեսուրսները կարելի է օգտագործել մարդկանց խնդիրների լուծմանը»,-ասաց նա:
