Լեռնային Ղարաբաղի հակամարտության գոտում մշտադիտարկման հնարավորությունների ընդլայնումը կարող է նպաստել լարվածության թուլացմանը: Այս մասին հունվարի 29-ին մամուլի ասուլիսի ժամանակ ասաց ԱԳ նախարար Էդվարդ Նալբանդյանը՝ ամփոփելով ԱԳՆ 2017 թվականի աշխատանքի արդյունքները (ֆոտոռեպորտաժ):
Նախարարը հիշեցրեց, որ համապատասխան համաձայնությունը ձեռք է բերվել Վիեննայում, սակայն հանդիպումից հետո Ադրբեջանը հաժարվել է այն կատարել: Կրակովում հարցը վերստին քննարկվել է եւ համաձայնություն է ձեռք բերվել մեկ քայլ առաջ կատարել՝ Կասպրշիկի թիմը 7 մարդով ավելացնելով: Կրակովից հետո Բաքուն դարձյալ լռում է, որոշման մասին խոսում են Հայաստանը եւ համանախագահները: «Միջնորդները փետրվարին կայցելեն տարածաշրջան, տեսնենք ինչ զարգացումներ կլինեն: Հույս ունենք, որ համաձայնությունը կիրականացվի, եւ Ադրբեջանը հետքայլ չի կատարի»,- նշեց նախարարը:
Ինչ վերաբերում է հետաքննության մեխանիզմներին, ապա դրանց մասին խոսվում է վերջին 8 տարիներին, սակայն Ադրբեջանը դարձյալ հրաժարվում է: Չնայած միջնորդները նվազագույնը 2 անգամ ասել են, որ Հայաստանը համաձայն է, եւ խոսքը Ադրբեջանինն է: «Հարցն օրակարգում է: Սա լարվածության թուլացման կարեւոր գործիք է»,- շեշտեց Նալբանդյանը: