Գիտությունների ազգային ակադեմիայում գիտնականների հետ հանդիպման ժամանակ ՀՀԿ-ի կողմից երկրի նախագահ առաջադրվելու առաջարկություն ստացած Արմեն Սարգսյանը կարեւորել է Հայաստանի կրթական եւ գիտական ոլորտների զարգացումը: Այս մասին հանդիպման ավարտին լրագրողների հետ զրույցում ասաց ՀՀ ԳԱԱ նախագահ, ակադեմիկոս Ռադիկ Մարտիրոսյանը: Նա նշեց, որ Արմեն Սարգսյանը նշել է, որ Հայաստանը քանի որ նյութական մեծ ռեսուրսներ չունի՝ անհրաժեշտ է, որպեսզի երկրի իշխանությունները քայլեր ձեռնարկեն գիտության, կրթության զարգացման ուղղությամբ:
«Արմեն Սարգսյանի հետ քննարկել ենք արտագաղթի խնդիրը, երկրի զարգացման հարցը, Արմեն Սարգսյանը շատ կարեւորեց երկրի արտաքին քաղաքականության այն մոդելը, որով ԵՏՄ եւ ԵՄ-ի հետ պայմանագրեր ենք կնքել, դա հնարավորություն է տալիս լայնացնել տնտեսական շուկան: Նա ասում է, ես տեսնում եմ հետեւյալը, քանի որ մենք նյութական մեծ ռեսուրսներ չունենք, պետք է գիտության, կրթության վրա երկրի իշխանությունները մեծ ուշադրություն դարձնեն»,-ասաց նա:
Ռադիկ Մարտիրոսյանը նշեց, որ գիտնականներին բացի նյութականից անհրաժեշտ է վերաբերմունք, որն այսօր պակասում է. «Նախկինում երիտասարդը, որը գիտության ոլորտում պետք է ճանապարհ ընտրեր, գիտեր, որ կապահովվի հեռանկարը, անխակությունը: Այժմ, ցավոք սրտի, նման համոզմունք երիտասարդների մոտ չկա: Դա է պատճառը, որ այսօր բնական, ճշգրիտ գիտությունների գծով մեր բուհական համակարգի ուսանողները քչացել են»:
