Կարտոֆիլագործությունը մեզ համար կարեւոր ճյուղ է, այն եկամտաբեր է, ունենք այս գործում հմտացած արտադրողներ, եւ մենք էլ մեր հերթին պետք է ամեն ինչ անենք, որպեսզի բարձրացնենք հայկական կարտոֆիլի մրցունակությունը: Այս մասին, այսօր՝ փետրվարի 5-ին, հանրապետության մի շարք կարտոֆիլագործների հետ հանդիպման ժամանակ նշել է ՀՀ գյուղատնտեսության նախարար Իգնատի Առաքելյանը:
Գյուղնախարարությունից NEWS.am-ին հայտնում են, որ հանդիպման մասնակիցները տեղեկացվել են, որ հայ-հոլանդական «Ագրիկո» ընկերության հետ համատեղ Գյումրիի սելեկցիոն կայանում իրականացվում են աշխատանքներ տեղական սերմնաբուծության զարգացման նպատակով: Ընկերության ներկայացուցիչը նշել է, որ կարտոֆիլի տնկանյութի սորտափորձարկման աշխատանքները կտեւեն մի քանի տարի, որից հետո հնարավոր կլինի պատասխանել հարցին` արդյոք հնարավոր է տեղում սերմնաբուծություն զարգացնել եւ արտադրողներին ապահովել կարտոֆիլի տեղական տնկանյութով:
Կարտոֆիլագործներն առաջարկել են աջակցություն ցուցաբերել անձրեւային ոռոգման համակարգի ներդրման եւ նորագույն գյուղտեխնիկա ձեռք բերելու հարցում` կարեւորելով այդ երկու գործոնների ազդեցությունն արտադրանքի ինքնարժեքի ձեւավորման մեջ:
Նախարարը նշել է, որ քայլեր կձեռնարկվեն կաթիլային համակարգի ներդրման սուբսիդավորման պետական աջակցության ծրագիրն ընդլայնելու ուղղությամբ, որպեսզի տնտեսավարողները ցածր տոկոսադրույքով վարկեր կարողանան ստանալ նաեւ այդ համակարգը ներդնելու համար: Բացի այդ նշվել է, որ կարող են ժամանակակից գյուղտեխնիկա ձեռք բերել պետական աջակցության լիզինգի ծրագրի շրջանակում, ինչպես նաեւ օգտվել մեքենատրակտորային կայանի ծառայություններից, որը կստեղծվի առաջիկայում:
