Եվրամիությունը սկսում է քննարկել վրացական ձեռնարկությունների հավատարմագրման հնարավորությունները, ինչի կապակցությամբ առաջիկայում ընթացակարգեր կսկսվեն: Բրյուսելում նման պայմանավորվածություն է ձեռք բերվել Վրաստանի վարչապետ Գեորգի Կվիրիկաշվիլիի եւ առեւտրի հարցերով եվրահանձնակատար Սեսիլիա Մալմստորի միջեւ, հաղորդում է «Նովոստի-Գրուզիան»:
ԵՄ հավատարմագրման չափանիշների բավարարումը թույլ կտա վրացական ձեռնարկություններին իրենց արտադրանքը արտահանել ԵՄ շուկա: Հանդիպման ընթացքում վարչապետը եւ Եվրոպական հանձնակատարը խոսել են նաեւ Վրաստանի եւ ԵՄ միջեւ առեւտրատնտեսական հարաբերությունների, խորը եւ համապարփակ ազատ առեւտրի համաձայնագրով նախատեսված հնարավորությունների օգտագործման մասին եւ շեշտել են այդ ուղղությամբ առկա առաջընթացը:
Առանձնահատուկ կերպով նշվել է Վրաստանի եւ Եվրամիության միջեւ աճող առեւտրային դինամիկան, մասնավորապես, այն փաստը, որ 2017 թվականի ընթացքում Վրաստանից արտահանումը դեպի ԵՄ երկրներ աճել է 13 տոկոսով եւ կազմել 647 մլն դոլար:
Ընդգծվել է ներդրումների տեսանկյունից դրական միտումը, ինչը արտացոլված է Եվրոպայից ներդրումների 6 տոկոս աճով: 2017 թվականին դրանք կազմել են 445 մլն դոլար:
