News
Լրահոս
News
Շաբաթ
Նոյեմբեր 27
Տեսնել լրահոսը

«Տրոյկա Դիալոգ» ներդրումային ընկերության նախկին սեփականատեր Ռուբեն Վարդանյանը եւ նրա գործընկերը՝ RD Group ընկերության հիմնադիր Գագիկ Ադիբեկյանը, որոշել են բաժանել համատեղ բիզնեսը, հաղորդում է «Վեդոմոստի»-ն` վկայակոչելով գործարարների շրջապատում աղբյուրներին եւ նրանց հետ աշխատած խորհրդատուներին:

Վարդանյանը եւ Ադիբեկյանը հանդես են գալիս որպես Avica Management Company ընկերության կողմից կառավարվող ֆոնդերի համաներդրողներ: Ընկերության պորտֆելում ակտիվների ընդհանուր արժեքն ավելի քան 1 մլրդ դոլար է: Դրանց թվում է Կուտուզովի պողոտայի վրա գտնվող «Վրեմենա գոդա» առեւտրի կենտրոնը, Dream House առեւտրի կենտրոնը՝ Ռուբլյովկայում, Մոսկվայի կենտրոնում գտնվող «Ռոմանով դվոր» գործարար թաղամասը, մասնաբաժինը «Վոզդվիժենկա» (նախկինում «Վոենտորգ») բիզնես կենտրոնում եւ այլն: Բացի այդ, Avica-ին է պատկանում նաեւ 50 տոկոսը ЕСЕ Russland ընկերությունում:

Ըստ «Վեդոմոստի»-ի՝ բանակցությունների երկու կողմերին էլ մոտ աղբյուրների՝ գործընկերների միջեւ գույքի բաժանումը դեռեւս չի ավարտվել, սակայն այս փուլում ենթադրվում է, որ Ադիբեկյանի RD Group-ը կստանա Avica-ի ֆոնդերի բոլոր առեւտրային օբյեկտները: Բացի Dream House եւ «Վրեմենա գոդա» առեւտրի կենտրոններին, նրանք նշում են նաեւ «Օբի Բոռովսկոյե» (Մոսկվա) եւ «Օբի Պուլկովսկոյե» (Սանկտ Պետերբուրգ) հիպերմարկետները: Վարդանյանին, ըստ «Վեդոմոստի»-ի զրուցակիցների՝ կփոխանցվի «Ռոմանով Դվոր»-ը եւ «Վոզդվիժենկա» բիզնես կենտրոնի մասնաբաժինը:

Վարդանյանի, Ադիբեկյանի եւ Avica Management Company-ի ներկայացուցիչները հրաժարվել են պատասխանել պարբերականի հարցերին:

«Տրոյկա Դիալոգ»-ի հիմնադիր եւ նախկին սեփականատեր Ռուբեն Վարդանյանը Forbes-ի վարկանիշում Ռուսաստանի խոշորագույն 200 գործարարների շարքում զբաղեցնում է 99-րդ տեղը՝ 950 միլիոն դոլար կարողությամբ: Վարդանյանը եւ նրա գործընկերները 2011 թվականին 1.35 մլրդ դոլարով վաճառեցին «Տրոյկա Դիալոգ»-ը «Սբերբանկ»-ին: 2013 թվականին Ֆինանսիստը հիմնադրեց «Վարդանյան, Բրոյտման եւ գործընկերները» ներդրումային ընկերությունը, որը, մասնավորապես, ներդրումներ է կատարել «Բալթտրանսսերվիս» նավթային բեռնափոխադրումներ իրականացնող ընկերությունում, «ԿամԱԶ»-ում,  Mediacrat հրատարակչատանը (Big Sport ամսագիր եւ այլն), ինչպես նաեւ UFS երկաթուղային տոմսերի առցանց վաճառքի ընկերությունում:

!
Այս նյութը հասանելի է նաև   Русский
Տպել
Ամենաշատ