«Այս տարվանից սկսած Վանաձոր համայնքի զարգացման ծրագիրը մտնելու է իր գործողությունների մեջ ու օգոստոսժ-սեպտեմբերից Վանաձորում Ասիական բանկի 25 մլն դոլարանոց ծրագրի մեկնարկն է տրվելու: Վանաձորի հիմանական բոլոր փողոցները, հրապարակները բարեկարգվելու են, այգիները կանաչապատվելու են ու Վանաձորը վերադառնալու է իր նախկին՝ կանաչ ու բարեկարգ քաղաքի համբավին»,- այսօր՝ փետրվարի 15-ին կայացած տարեկան մամլո ասուլիսի ժամանակ տեղեկացրեց Լոռու մարզպետ Արթուր Նալբանդյանը:
Վերջինիս խոսքով՝ սա շատ կարեւոր ծրագիր է եւ Վանաձորի քաղաքապետարանը արդեն իսկ մշակել է նախնական տարբերակներն ու նախագծերը, ուղարկել տարածքային կառավարման նախարարություն: Մի քանի փոփոխություններից հետո անպայման 25 մլն դոլարի ներդրումային ծրագիրը մտնելու է Վանաձոր ու դուք կտեսնեք, թե ինչ կարճ ժամանակում Վանաձորը կփոխվի, դրան զուգահեռ բնականաբար կփոխվեն մեր տրամադարությունները, մեր տրամադրության հետ նաեւ մեր դեմքի արտահայտությունը:
«Վանաձորի զարգացման ծրագիրը մենք կապում ենք նաեւ ճոպանուղու կառուցման հետ: Շահումյանի ճոպանուղու մասով միայն առաջին փուլում անհրաժեշտ է լինելու 3000 մարդու գիշերակացի տեղ, իսկ այսօրվա դրությամբ մեր մարզի ամբողջ հյուրանոցային հնարավորությունը կազմում է 1.800-2.000 մարդ՝ օրական,- նշեց նա, հավելելով,-դուք պատկերացրեք, թե այդ ճոպանուղին իր հետ ինչ ներդումային ծրագրեր է բերելու: Բոլորիս էլ պարզ է, որ այդ ներդրումային ծրագրերի մեծ բաժինը ընկնելու է Վանաձոր համայնքի վրա եւ վստահեցոնւմ եմ ձեզ, որ աշխատանքների հենց առաջին օրվանից սկսած Վանաձորւմ բում է սկսվելու, շինարարական բում»:
Բացի այն, որ Շահումյանի ճոպանուղու կառուցման ծրագիրը պետք է կյանքի կոչվի, նաեւ զուգահեռ վարչապետի հանձնարարությամբ Վանաձորի զարգացման ծրագիրն է ավարտական փուլում:
«Մենք փորձելու ենք այդ երեք ուղղություններով ծրագրերը դարձնել մեկ ընդհանուր՝ Վանաձորի զարգացման ռազմավարություն ու զարգացման ծրագիր, որի մեջ կներառվի Ասիական բանկի 25 մլն դոլարանոց ներդրումը, վարչապետի կողմից հանձնարարված զարգացման ծրագիրն ու Շահումյանի ճոպանողու ծրագիրը»,- ասաց մարզպետը:
Հետագայում, համայնքների խոշորացման պրոցեսների արդյունքում Շահումյանը համայնքը կընդգրկվի Վանաձոր համայնքի վարչական տարածքում:
