Չինաստանում փետրվարի 16-ին Ամանոր են նշում: Ավանդաբար Ամանորյա տոնակատարությունները սկսվում են առաջին լուսնային ամսվա առաջին օրը եւ 15 օր են տեւում (այս տարի` փետրվարի 16-ից մարտի 2-ը): Նշենք, որ առաջ չինացիները Ամանորը մի ամբողջ ամիս էին նշում, այնպես որ երկու շաբաթը այդքան էլ շատ չէ: Չինաստանում Ամանորի առթիվ պաշտոնապես 7 օր (այս տարի` փետրվարի 15-21-ը) արձակուրդ է տրմադրվում:

Այս տարի, ըստ արեւելյան օրացույցի, լիարժեք տիրուհի կդառնա Դեղին հողային շունը: Չինաստանում այս տոնին, որն ավելի քան 4000 տարեկան է, պատրաստվում են նախապես:

Վերջին լուսնայի ամսվա 23-րդ օրը մարդիկ համընդհանուր մաքրություն են անում: Միեւնույն ժամանակ անհրաժեշտ է մաքրել ոչ միայն տունը, այլ նաեւ մտքերը. կարեւոր է ազատվել տարվա ընթացքում կուտակված բոլոր դժվարություններից եւ վատ հիշողություններից, գրում է «ՆՎ»-ն:

Գարնան Տոնից մի քանի օր առաջ մարդիկ զարդարում են տան պատուհանները ավանդական նախշերով, թղթերով եւ վառ գույների ծաղկեպսակներով: Հիմնականում, իհարկե, կարմիր.

Կարմիրը ձգում է հաջողությունը եւ վախեցնում է սարսափելի արարածին, որն, ըստ առասպելի, ամեն տարի հայտնվում է հենց Ամանորին:

Ընդունված է նաեւ նվերներ մատուցելը, հիմնականում, փողով կարմիր ծրարներ, հատկապես երեխաների համար: Համարվում է, որ փողը պետք է այլ փողեր ձգի, հատկապես այն փողը, որը լավագույն ցանկություններով հարազատներն են նվիրել: