ԵՊՀ Ռոմանագերմանական բանասիրության ֆակուլտետի փոխդեկան Գեւորգ Բարսեղյանն այն մարդը չէ, որ աղջկա պատվի հետ խաղա, ուղղակի չամուսնացած մարդ է, ուզեցել են գլխին սարքեն: Այս մասին, այսօր՝ փետրվարի 21-ին, ԵՊՀ-ի դիմաց լրագրողների հետ զրույցում նշեց ի պաշտպանություն փոխդեկանի ակցիայի մասնակիցներից Հասմիկ Սարգսյանը:
«Բացի այդ, շուտով դեկանի ընտրություններ են ու քանի որ գլխավոր հավակնորդը փոխդեկանն է, դրա համար հենց իրեն են կպնում: Ըստ լուրերի, մի քանի տղաներ աղջկա պատիվը բարձր պահելու համար գնացել են, իբր, Բարսեղյանին ծեծել են: Բայց այդ աղջիկը մի քանի տեղ գրել է, որ Բարսեղյանն ինձ ոչինչ չի արել»,-ասաց նա:
Սոցիոլոգիայի ֆակուլտետի ուսանողուհին նշեց, որ ոչ ոք իրավունք չունի ձեռք բարձրացնել փոխդեկանի վրա. «Թող դիմեին դեկանատ կամ իրավապահներին: Նախ ապացույց է պետք, որ տեսեք՝ ընկեր Բարսեղյանը սենց-սենց բան է արել, ու դրանից հետո ռեկտորը կորոշեր, թե ինչ անել: Իրենք ուսանողը են, իրենք իրավունք չունեին ձեռք բարձրացնել: Մենք հիմա ընկեր Բարսեղյանի խնդրանքով դադարեցնում ենք ակցիան, բայց եթե պետք լինի, եթե տեսնենք, որ նրա դեմ ինչ-որ նոր բաներ են լինում, մենք նորից կշարունակենք»,-ասաց նա:
Ավելի վաղ NEWS.am-ը հայտնել էր, որ ԵՊՀ Ռոմանագերմանական բանասիրության ֆակուլտետի ուսանողուհիները բողոքի ակցիա են կազմակերպել համալսարանի դիմաց՝ պահանջելով համալսարանից չհեռացնել Ռոմանոգերմանական ֆակուլտետի փոխդեկան Գեւորգ Բարսեղյանին։
Հիշեցնենք, որ Գեւորգ Բարսեղյանի աշխատասենյակում փետրվարի 16-ին ծեծկռտուք էր տեղի ունեցել. ըստ շրջանառվող լուրերի՝ պատճառը ուսանողուհուն արված անպարկեշտ առաջարկն է եղել, որը Բարսեղյանը ավելի ուշ հերքել էր:
Ուսանողուհիները նշել են, որ փոխդեկանին համարում են կիրթ, խելացի անձնավորություն եւ չեն հավատում, որ նա կարող էր նման արարք իրեն թույլ տալ:
