«Քարակերտի քարաձուլման գործարան» ՓԲԸ-ն դիմել է Հանրային խորհուրդ, որպեսզի խորհրդի համապատասխան հանձնաժողովում քննարկվի քարաձուլարանի վերագործարկման հնարավորության հարցը:
ՀԽ-ից NEWS.am-ին հայտնում են, որ Հանրային խորհրդի ֆինանսատնտեսական եւ բյուջետային հարցերի հանձնաժողովում հարցն ուսումնասիրելու նպատակով ստեղծվել է մասնագիտական աշխատանքային խումբ, որն այցելել է գործարան, տեղում ծանոթացել գործարանի ներկա իրավիճակին եւ առկա ռեսուրսներին: Աշխատանքային խումբը ղեկավարել է Հանրային խորհրդի ֆինանսատնտեսական եւ բյուջետային հարցերի հանձնաժողովի փորձագետ Գագիկ Դորունցը:
Ս.թ. փետրվարի 21-ին ՀԽ ֆինանսատնտեսական եւ բյուջետային հարցերի հանձնաժողովում տեղի է ունեցել նիստ, որի օրակարգային հիմնական հարցը վերաբերել է Քարակերտի քարաձուլարանի վերագործարկման հնարավորություններին: Նիստի ընթացքում Գագիկ Դորունցը մանրամասն տեղեկանք է ներկայացրել իրենց ուսումնասիրությունների վերաբերյալ՝ ներկայացնելով գործարանի պատմությունը, աշխատելու ժամանակահատվածում ցուցաբերած արդյունքները եւ այն պոտենցիալը, որը հնարավոր է օգտագործել նաեւ այսօր՝ վերականգնելով բազալտի սալիկների եւ բազալտի մանրաթելի արտադրությունը:
«Որպեսզի գործարանը հնարավոր լինի վերագործարկել, անհրաժեշտ է իմանալ, թե ինչ ծախսեր են անհրաժեշտ: Ուստի մենք առաջարկում ենք ֆինանսների ծավալը որոշելու համար ստեղծել մասնագիտական խումբ, որը պետք է իրականացնի գործարանի շենք-շինություններ, սարքավորումների գույքագրում, տեխնիկական զննում, որոնց հիման վրա կազմի արձանագրություն հայտնաբերված թերությունների մասին եւ մշակի գործարանի վերագործարկան տեխնիկական նախագիծ եւ նախահաշիվ»,-նշել է Գագիկ Դորունցը:
Քարակերտի քարաձուլման գործարանի տնօրենների խորհրդի նախագահ Սուրեն Գեւորգյանը, ներկայացնելով գործարանի վերագործարկման անհրաժեշտությունը, նշել է, որ Հայաստանի տնտեսության զարգացման կարեւոր ուղղությունններրց մեկը ոչ մետաղական հանքանյութերի համալիր վերամշակման կազմակերպումն է: «Ոչ մետաղական հանքանյութերը մեր բրենդն է, մենք կարող ենք մինչեւ 50-60 անուն արտադրանք ստանալ (փքապեռլիտից՝ ձայնաջերմամեկուսիչ սալիկներ, սննդի եւ քիմիական արդյունաբերության համար՝ ֆիլտրեր եւ այլն), որոնք մրցունակ են միջազգային շուկայում եւ ապահովում են գերշահույթ: Ես իմ ասածի հիմնավորումները նաեւ ՀՀ կառավարություն եմ ներկայացրել: Ինչո՞ւ մենք մեր կարողությունը չենք օգտագործում»:
Օրակարգի հաջորդ հարցը կապված է եղել Տավուշի մարզում ինդուստրիալ էկոլոգիական պարկի ձեւավորման եւ գործունեության ծրագրի հետ, որը ներկայացրել է գործարար Տարոն Սահակյանը: Գործարարը նախատեսում է Տավուշի մարզի ցիալիտի ոչ բնափայտային եւ բենտոնիտի պաշարների հիման վրա կազմակերպել արտադրություն, մասնավորապես բազալտի մանրաթելերի եւ բենտոնիտի հիման վրա՝ «բենտոմատ» հակաֆիլտրացիոն ծածկույթի արտադրություն:
ՀԽ ֆինանսատնտեսական եւ բյուջետային հարցերի հանձնաժողովի նախագահ Վազգեն Սաֆարյանը նշել է, որ օրակարգի երկու հարցերը փոխկապակցված են. «Քանի որ Տարոն Սահակյանի ներկայացրած ծրագիրը իրատեսական է, ուստի անհրաժեշտ է նաեւ բազալտի մանրաթելի արտադրություն, դա է պատճառը, որ մենք առաջարկում ենք քննարկել Քարակերտի քարաձուլարանի վերագործարկման հարցը»,-ասել է Սաֆարյանը՝ հավելելով, որ սա առաջին փորձը կլինի նաեւ արդյունաբերական կոոպերացիայի իմաստով:
Տարոն Սահակյանը առաջարկել է իր ծրագիրը եւ գործարանի վերագործարկման հարցը ներկայացնել Հանրապետության նախագահին՝ հիմնավորելով, որ այն պահապատասխանում է 2017 թվականին ՀՀ նախագահի կարգադրությամբ հաստատված՝ «ՀՀ բնական պաշարների կառավարման հայեցակարգի» պահանջներին, ինչպես նաեւ իրական հնարավորություն է ստեղծում միջմարզային կապերի ձեւավորման եւ մարզերի համաչափ զարգացման ծրագրեր իրականացնելու համար:
Նիստի ավարտին, հաշվի առնելով շահագրգիռ քննարկման արդյունքում ներկայացված առաջարկությունները, որոշվել է կազմել տեղեկանք գործարանի վերագործարկման անհրաժեշտության մասին եւ ներկայացնել ՀՀ կառավարություն: Որոշվել է նաեւ առանձին քննարկում կազմակերպել Տավուշի մարզում ինդուստրիալ էկոլոգիական պարկի ձեւավորման եւ գործունեության ծրագրի վերաբերյալ:
