Փետրվարի 22-ին Վրաստանում ՀՀ դեսպան Ռուբեն Սադոյանը հանդիպում ունեցավ Վրաստանի մշակույթի եւ սպորտի նախարար Միխեիլ Գիորգաձեի հետ։

ՀՀ ԱԳՆ մամուլի ծառայությունից NEWS.am-ին հայտնում են, որ հանդիպմանը զրուցակիցները քննարկեցին երկկողմ մշակութային համագործակցությանն առնչվող հարցերի լայն շրջանակ։ Խոսելով հայ-վրացական մշակութային համագործակցության մասին՝ կողմերն ընդգծեցին, որ այդ ուղղությամբ գործուն քայլեր են կատարվում, եւ մատնանշեցին երկու երկրների համապատասխան գերատեսչությունների ներկայացուցիչներից ձեւավորված աշխատանքային խմբի ակտիվ գործունեությունը։

Նախարար Գիորգաձեն շեշտեց հայ եւ վրացի ժողովուրդների մշակութային դարավոր ավանդույթների եւ պատմականորեն ձեւավորված բազմաթիվ ընդհանրությունների մասին:

Անդրադառնալով պատմականորեն ձեւավորված եղբայրական հարաբերություններին՝ դեսպան Սադոյանը նշեց, որ պետք է լուրջ աշխատանք կատարել այն ուղղությամբ, որպեսզի Հայաստանի եւ Վրաստանի երիտասարդների միջեւ եւս ակտիվանան փոխշփումները։

Այս համատեքստում կողմերը համակարծիք էին, որ տարբեր ծրագրերի եւ նախագծերի շրջանակներում պետք է ավելի հաճախակի կազմակերպել փոխայցելություններ, որոնք հնարավորություն կընձեռեն նոր սերնդին նաեւ ավելի ավելի լավ ճանաչել մեր երկրներն ու մշակույթները: