Նախորդ տարի հուլիսի 11-ին Գյումրու Վ.Սարգսյան փողոցում տեղի ունեցած ավտովթարի հետեւանքով մահացած երիտասարդ ամուսինների գործով ամբաստանյալի խափանման միջոցը փոխելու միջնորդությունը դատարանը մերժել է: Այս մասին NEWS.am-ի հետ զրույցում ասաց մեղադրյալի պաշտպան Արամայիս Հայրապետյանը` նշելով, որ այդ մերժումը վիճահարույց է իր կարծիքով:
«Իհարկե, վիճահարույց է իմ ներկայացրած միջնորդության մերժումը, քանի որ օրենսդրական փոփոխություններ են եղել, կալանավորման հիմքերը էապես փոփոխվել են, որը, սակայն, դատարանը հաշվի չառավ: Այն հիմքով, որով իմ պաշտպանյալը կալանավորվել էր ժամանակին, այլեւ գոյություն չունի այս պահին եւ մենք այդ հիմքով միջնորդություն ներկայացրեցինք, որ իմ պաշտպանյալին այլեւս չպետք է կալանքի տակ պահել: Իմ կարծիքով` դատարանը երեւի գործի հնչեղությունը հաշվի առնելով մերժեց, քանի որ ուրիշ փաստական հանգամանք չկար»,-ասաց պաշտպանը:
Արամայիս Հայրապետյանը նշեց, որ իր պաշտպանյալը` Ալբերտ Խանոյանը, դեռ նախաքննության ժամանակ իր մեղքն ընդունել է եւ ինքը չի էլ վիճարկում իր անմեղությունը դատարանում:
Արամայիս Հայրապետյանը նաեւ հավելեց, որ իր պաշտպանյալը արագությունը չի գերազանցել, այլ վատ եղանակային պայմանների պատճառով է տեղի ունեցել վրաերթը:
Նշենք, որ գործով վկաներին հարցաքննել են արդեն:
Ավելի վաղ NEWS.am-ը հայտնել էր, որ հուլիսի 11-ի երեկոյան Գյումրի քաղաքում Opel մակնիշի 15 XX 550 համարանիշի ավտոմեքենայի վարորդը Վազգեն Սարգսյան փողոցում վրաերթի է ենթարկել 2 հետիոտնի: Վրաերթի օրը տեղում մահացել էր 30-ամյա Նելսիկ Ղազարյանը, իսկ նրա 23-ամյա կինը՝ Արփինե Մանուկյանը մեկ օր անց հիվանդանոցում էր մահացել: Արփինե Մանուկյանը սպասոում էր երեխայի:
Ալբերտ Խանոյանին մեղադրանք է առաջադրվել ՀՀ ՔՕ 242 հոդվածի 3-դ մասով՝ Ճանապարհային երթեւեկության եւ տրանսպորտային միջոցների շահագործման կանոնները խախտելը: