«Երկիր Ծիրանի» կուսակցությունն այսօր՝ մարտի 1-ին, բողոքի ակցիա է անցկացնում Ազգային անվտանգության ծառայության շենքի դիմաց:
NEWS.am-ի թղթակիցը հաղորդում է, որ «Երկիր Ծիրանի» կուսակցության անդամներին միացել են նաեւ ակտիվիստներ, որոնք ԱԱԾ-ից պահանջում են բացահայտել «Մարտի 1»-ի ոճրագործությունը: Բողոքի ակցիան մեծ թվով ոստիկաններ են հսկում:
Հիշեցնենք, որ 2008թ. փետրվարի 18-ի նախագահական ընտրություններից հետո ՀՀ առաջին նախագահ Լեւոն Տեր-Պետրոսյանի կողմնակիցները հավաքվել էին Ազատության հրապարակում եւ պահանջում էին ընտրությունների արդյունքների վերանայում: Նրանք 10 օր շարունակ շուրջօրյա հանրահավաքներ էին անցկացնում հրապարակում:
Մարտի 1-ի առավոտյան ոստիկանությունը ուժով ցրեց Ազատության հրապարակում հավաքվածներին: Մարդիկ սկսեցին հավաքվել Մյասնիկյանի արձանի մոտ: Նույն օրը երեկոյան երկրի նախագահ Ռոբերտ Քոչարյանն արտակարգ դրություն հայտարարեց, ապա ուժային կառույցները հրազեն կիրառեցին անզեն ցուցարարների դեմ, որի հետեւանքով զոհվեց 10 քաղաքացի, այդ թվում՝ երկու ոստիկան, եւս 200 մարդ տարբեր աստիճանի վնասվածքներ ստացան: Հայաստանում տեղի ունեցան զանգվածային ձերբակալություններ ու կալանավորումներ:
Այս իրադարձությունների 10 զոհերն են. Գոռ Քլոյան, Դավիթ Պետրոսյան, Տիգրան Աբգարյան, Տիգրան Խաչատրյան, Արմեն Ֆարմանյան, Հովհաննես Հովհաննիսյան, Համլետ Թադեւոսյան, Գրիգոր Գեւորգյան, Սամվել Հարությունյան, Զաքար Հովհաննիսյան:
Այսօր՝ այդ դեպքերից 10 տարի անց, տասը անձանց մահվան համար ոչ ոք պատասխանատվության չի ենթարկվել եւ չի դատապարտվել: Զոհված 8 քաղաքացիական անձանցից 7-ը մահացել են հրազենային վիրավորման հետեւանքով, ընդ որում` 3-ը զոհվել են «Չերյոմուխա-7» տեսակի հատուկ միջոցներից վիրավորվելու հետեւանքով, որն օգտագործվել է իրավապահ մարմինների կողմից:
