Առանց 2008 թվականի մարտի 1-ի իրադարձությունների չէր լինի ներկայիս իշխանությունն իր այսօրվա տեսքով: Այս մասին «Մեդիամաքս» կենտրոնում ընթացող քննարկման ժամանակ ասաց «Մարտի 1» ՀԿ համակարգող Առաքել Սեմիրջյանը:
Պատասխանելով Մարտի 1-ի իրդարձությունների մասին խորհրդարանական լսումներին վերաբերող հարցին՝ Սեմիրջյանն այն շոու անվանեց: «Ես պատրաստ եմ շոուին մաս կազմել, որպեսզի մարդիկ չմոռանան Մարտի 1-ի իրադարձությունները: Հասկանալի է, որ քննարկումները գոլորշի բաց թողնելու նպատակ ունեն: Սակայն դրանց մասնակցելը դրանց լրջություն հաղորդելու միակ ճանապարհն է»,- կարծում է ՀԿ համակարգողը:
«Նախագահը խոսում է այն մասին, որ 40-50 ցուցարարներ հարձակվել են ոստիկանի վրա եւ նրան սպանել: Ես նախագահին հավատում եմ: Թող տեսանյութ ներկայացնեն, ինչի մասին նա խոսում է»,- հեգնանքով նշեց Սեմիրջյանը:
ՀԿ համակարգողն առաջարկեց Երեւանում Մարտի 1-ի իրադարձությունների զոհերի հուշարձան տեղադրել եւ նրանց անունով փողոց անվանակոչել. «Դե եթե չենք կարողանում մեղավորներին ճաղերի հետեւում նստացնել, գոնե կատարենք նվազագույն ծրագիրը»: