2008 թվականի մարտի 1-ի իրադարձությունների գործը բացահայտված է: Այլ հարց է, որ մեղավորները դատարանի առաջ չեն կանգնել: Այս մասին «Մեդիակենտրոնում» ընթացող քննարկման ժամանակ ասաց «Իրավունքի եւ ազատության կենտրոնի» նախագահ Վարդան Հարությունյանը:
«Մարդիկ չեն մոռացել: Նման բանը չի մոռացվում: Պատմության մեջ նախադեպ չկա, որ հրապարակային մահապատիժները, անմեղ մարդկանց սպանությունները մոռացվեն»,- հայտարարեց Վարդան Հարությունյանը: Նա որպես օրինակ բերեց այն հանգամանքը, որ Հայոց ցեղասպանության ճանաչումը մի քանի տասնամյակներ օրակարգում չի եղել, եւ միայն անցյալ դարի 60-ական թվականներին է սկսվել միջազգային ճանաչման ու դատապարտման միտումը:
«Մարտի 1-ի հանցագործությունն, ըստ էության, բացահայտված է: Այլ հարց է, որ մեղավորնեը դատարանի առաջ չեն կանգնել: Աշխարհում այսպիսի շատ օրինակներ կան: Այլ դեպքերում ստիպված ես սպասել, երբ մեղավոր անձը կդադարի իշխանությամբ օժտված լինել: Ներկայիս իշխանությունը ձեւավորվել է այդ իրադարձությունների արդյունքում, եւ միամիտ կլիներ կարծել, որ այն չի հակազդի հանցագործության բացահայտմանը: Այս պայմաններում պատժի մասին խոսելը վաղ է»,- նշեց Հարությունյանը:
