Պաշտոնական այցով մարտի 2-ին Հայաստան կժամանի Վրաստանի վարչապետ Գիորգի Կվիրիկաշվիլիի գլխավորած պատվիրակությունը։ NEWS.am-ը կառավարության մամուլի ծառայությունից տեղեկանում է, որ այցի շրջանակներում նախատեսված են նրա հանդիպումները ՀՀ նախագահի եւ վարչապետի հետ:
Կառավարությունում կկայանա Կարեն Կարապետյանի եւ Գիորգի Կվիրիկաշվիլիի առանձնազրույցը, որին կհաջորդի պատվիրակությունների հանդիպումը ընդլայնված կազմով: Բանակցությունների ավարտին երկու երկրների վարչապետները հանդես կգան հանդիպման արդյունքներն ամփոփող հայտարարություններով:
Վրաստանի վարչապետը կայցելի նաեւ Ծիծեռնակաբերդի հուշահամալիր, հարգանքի տուրք կմատուցի Հայոց ցեղասպանության զոհերի հիշատակին: Գիորգի Կվիրիկաշվիլին կհյուրընկալվի նաեւ «Թումո» ստեղծարար տեխնոլոգիաների կենտրոնում:
