Google-ը գործարկել է Song Maker ծառայությունը, հայտնում է The Verge-ը: Վիրտուալ գործիքի միջոցով կարելի է երաժշտություն գրել: Անվճար ծրագիրն աշխատում է ինչպես բջջային, այնպես էլ բրաուզերի էկրանային տարբերակով:
Ծառայությունը թույլ է տալիս երաժշտություն գրել 2 տարբեր գործիքների համար, որոնք օգտատերը կարող է ինքնուրույն ընտրել: Գաղափարը մշակել է Chrome Music Lab-ը. այս փորձարարական լաբորատորիան ստեղծվել է 2016 թվականին:
Google-ի նոր սեքվենսորը ներառում է երաժշտական գործիքների վիտուալ նմանակների լայն ընտրություն՝ ստեղնաշարային, լարային, փողային, էլեկտրոնային: Բարձրախոս միացնելու եւ ձայնային ռեժիմի անցնելու, օրինակ՝ նոտան երգելու հնարավորություն կա, ծրագիրն ավտոմատ այն կճանաչի եւ կգրանցի:
Վիրտուալ նոտատետրը վանդակավոր քառակուսի է, որոնցում տեղադրված են նոտաները: Յուրաքանչյուր նոտա իր գույնն ունի: Քառակուսու հորիզոնագծով կարգավորվում է մեղեդու տեւողությունը, ուղղահայացներով՝ նոտաների բարձրությունը: Աշխատանքային մակերեսի ներքեւի շերտը պատասխանատու է հարվածների կարգավորման համար:
Մեղեդին կարելի է ստեղծել մկնիկի, MIDI ստեղնաշարի կամ մատների օգնությամբ, եթե աշխատում եք սենսորային սարքով: Սեքվենսորի գործառույթներից են երաժշտական վերարտադրության տեմպի հաստատումը, հարվածների թիվը, օկտավների միջակայքի ընտրությունը եւ այլն: Պատրաստի մեղեդին կարելի է պահպանել հղման ձեւով կամ ուղարկել այլ օգտատերերի: Երաժշտություն կարելի է գրել ինչպես միայնակ, այնպես էլ ընկերների հետ միասին: Ծրագիրը չի նախատեսում կոմպոզիցիան բեռնել եւ առանձին կրիչի վրա պահպանել ֆայլի ձեւով: