Դուբայի օդանավակայանում վիրտուալ մաքսատան աշխատակից կհայտնվի։ Ռոբոտը կհայտնաբերի կասկածելի անձանց եւ կզեկուցի ղեկավարությանը, հաղորդում է Khaleejtimes պարբերականը։
Նոր ռոբոտը կարող է օբյեկտները սքանավորել ռենտգենային ճառագայթների միջոցով եւ ջերմային ընկալիչի միջոցով ճանաչել անձանց։ Ռոբոտը հավաքում է տվյալները, վերլուծում եւ սահմանում այս կամ այն անձի վտանգավորության աստիճանը։ Վտանգավորության բարձր մակարդակի պարագայում ռոբոտը նախազգուշացնող հաղորդագրություն է ուղարկում Կառավարման կենտրոն։ Եթե սքանավորումը ցույց է տալիս, որ ուղեւորն անվտանգ է, ռոբոտն ուղղակի ողջունում է նրան։
Ռոբոտին մշակել են Դուբայի մաքսային ծառայությունների նորարարության կենտրոնում։ «Այն աշխատում է Android համակարգով։ Ռոբոտն անցել է պիլոտային փորձարկում եւ շուտով կհանձնվի շահագործման։ Այս նորարությունը մեր լավագույն նախագիծը կդառնա»,- պարբերականին ասել է Կենտրոնի մասնագետ Հալիդ ալ Զարունին։
Ռոբոտի փորձարկումը ցույց է տվել, որ այն ունակ է լուծել իր առջեւ դրված խնդիրները։ Ռոբոտը կտեղադրվի օդանավակայանի ժամանման գոտում։
Նշենք, որ սա առաջին վիրտուալ օգնականը չէ Արաբական Միացյալ Էմիրություններում։ Robocop առաջին ոստիկան-ռոբոտը անցյալ տարի պաշտոնապես ներառվել էր Դուբայի ոստիկանության կազմում: Ռոբոտը տեղանքում կողմնորոշվում է ներկառուցված նավիգատորի շնորհիվ, հաղորդակցվում է վեց լեզուներով, ներառյալ՝ անգլերենով եւ արաբերենով: Քաղաքացիները կարողանում են դրա միջոցով վարկային քարտով վճարել ոստիկանության ծառայությունները: Ռոբոտի հասակը 170 սանտիմետր է, քաշը՝ 100 կիլոգրամ: Այն հագեցած է հույզերի դետեկտորով, որը ճանաչում է մարդկանց դեմքի արտահայտությունը եւ ժեստերը մինչեւ 1,5 մետր հեռավորության վրա: Այսպիսով ռոբոտը կարող է շփում հաստատել մարդկանց հետ եւ բացահայտել իրավախախտներին:
Պարեկություն կատարելով փողոցներում ու առեւտրական կենտրոններում՝ Robocop-ը կտրամադրի համապատասխան տեսագրություններ եւ դրանով իսկ կարգուկանոնի պահապաններին կօգնի գտնել հանցագործներին:
Մինչեւ 2020 թվականը ԱՄԷ-ում նախատեսում են սահմանապահներին օդանավակայաններում փոխարինել արհեստական ինտելեկտով։