Մերձավոր Արեւելքում մեծ թվով արտաքին խաղացողներ են գործարկված, սակայն Դամասկոսին Ռուսաստանի աջակցությամբ հաջողվել է հաղթանակ տանել «Իսլամական պետության» նկատմամբ եւ ընդհանուր առմամբ կայունացնել իրավիճակը երկրում: Այս մասին մարտի 6-ին «ՀԱՊԿ անդամ պետությունների համար ռազմական անվտանգության հիմնական սպառնալիքները» թեմայով Մոսկվա-Երեւան-Աստանա-Բիշքեկ-Մինսկ հեռուստակամուրջի ժամանակ հայտարարել է ՀԱՊԿ-ի միացյալ շտաբի պետ գեներալ-գնդապետ Անատոլի Սիդորովը:
Գեներալ-գնդապետի կարծիքով՝ ապակայունացման միտումների լուրջ աճը բնորոշ է նաեւ Կենտրոնական Ասիային: «Ընդ որում, հիմնական սպառնալիքներ Աֆղանստանում գործող միջազգային ահաբեկչական կազմակերպությունների գործունեությունն է եւ նրանց գործողությունների հնարավոր տեղափոխումը Կենտրոնական Ասիայի երկրներ, ինչպես նաեւ կրոնական ծայրահեղականության տարածումը»,- մանրամասնել է Սիդորովը:
Բացի այդ, ՀԱՊԿ-ի միացյալ շտաբի պետի խոսքով, նշված տարածաշրջանին սպառնում է նաեւ թմրանյութերի շրջանառության աճը: Նա հավելել է, ո, րըստ որոշ տվյալների, ներկայումս Աֆղանստանում մոտ 70 հազար զինյալ է գործում: Ընդ որում, հակակառավարական ուժերի հիմքը իսլամական «Թալիբան» շարժման խմբավորումներն են կազմում՝ ավելի քան 60 հազար մարդ: «Ակտիվացել է նաեւ Ռուսաստանի Դաշնությունում արգելված «ԻՊ»-ի գործունեությունը: Ընդ որում, նրանց թվաքանակը տարածաշրջանում մշտապես աճում է», - ընդգծել է գեներալ-գնդապետը: Ահաբեկչական սպառնալիքների աճին, ըստ Անատոլի Սիդորովի, նպաստում է նաեւ թեժ կետերում, մասնավորապես՝ արտասահմանում եւ առաջին հերթին Սիրիայում, փորձ ձեռքբերած զինյալների վերադարձը հայրենիք: Այնտեղ, ըստ գեներալ-գնդապետի, նախկին սովետական միջինասիական պետություններից մոտ 3 հազար մարդ կա: