Նորընտիր նախագահ Արմեն Սարգսյանը չի բավարարվի ձեւական լիազորություններով։ Այսպիսի կարծիք մարտի 13-ին՝ լրագրողների հետ հանդիպման ժամանակ հայտնել է «Այլընտրանք» վերլուծական կենտրոնի ղեկավար, տնտեսական գիտությունների դոկտոր, պրոֆեսոր Թաթուլ Մանասերյանը։
Նրա խոսքով, սահմանադրությունը նորընտիր նախագահին քիչ լիազորություններ չի տալիս, իսկ Արմեն Սարգսյանն ունի հնարավորություն իր ժողովրդի խնդիրներով զբաղվել. « Չավարտված պատերազմի պայմաններում Հայաստանի համար կարեւոր է ինչպես նախագահը, այնպես էլ վարչապետը»,–նշել է Մանասերյանը։
Նրա կարծիքով, Արմեն Սարգսյանի փորձն ու հեղինակությունն անհրաժեշտ է բարձր գնահատել, իսկ այդ համատեքստում սպասելիքները նրանից բավականին բարձր են։ Տնտեսագետը հույս է հայտնել, որ Սարգսյանին կհաջողվի արդյունավետ աշխատանք իրականացնել իշխանության եւ ժողովրդի բազմամյա անվստահության մթնոլորտը հաղթահարելու համար։
Խորհրդարանի նախկին պատգամավոր Մկրտիչ Մինասյանը, իր հերթին, նշել է, որ խորհրդարանական հանրապետության նախագահը հնարավորություն ունի ազդել այս կամ այն գործընթացի վրա, քանի որ վերջնարդյունքում հաստատում կամ ստորագրում է հիմնական փաստաթղթերը եւ որոշումները, իսկ եթե վերջիններս չեն համապատասխանում սահմանադրությանը կամ երկրի շահերին, նա կարող է չստորագրել եւ դիմել Սահմանադրական դատարան։ «Արմեն Սարգսյանն ունի համապատասխան փորձ, տաղանդ եւ կապեր, որոնք կարող է ծառայեցնել մեր երկրի շահերին », - վստահեցրել է նա:
