Ուրախալի է նոր ավիաընկերությունների մուտքը հայկական շուկա շարունակվում է: Այս մասին, այսօր՝ մարտի 15-ին, կառավարության նիստից հետո լրագրողների հետ զրույցում նշեց Քաղավիացիայի գլխավոր վարչության պետ Սերգեյ Ավետիսյանը՝ անդրադառնալով հայկական շուկա ռուսական Red Wings ավիաընկերության մուտքին:
Նրա խոսքով, ռուսական շուկան մեզանում շատ պահանջված է, կա աշխատելու տեղ:
«Այստեղ մենաշնորհի մասին խոսելն ընդհանրապես անիմաստ է ու ճիշտ չէ: Մենք ունենք շատ տնտեսվարողներ, միայն Մոսկվայի ուղղությամբ սեզոնայնությունից ելնելով, ունենում ենք օրական մինչեւ 15 չվերթ: Իսկ սա նոր ավիաընկերություն է, որն ամենօրյա ռեժիմով թռիչքներ է իրականացնելւ դեպի Մոսկվա, ինչը եւս դրական կանդրադառնա մրցակցության վրա»,-ասաց Ավետիսյանը:
Նա չհամաձայնեց, որ դեպի Ռուսաստան տոմսերը բավական թանկ են. «Տնտեսագիտության բազային կանոններն ասում են, որ ավելացող մրցակցությունը դրականորեն է ազդում գների վրա, իսկ ամռանը ամբողջ աշխարհում, այդ թվում Հայաստանում, տոմսերը թանկանում են»:
Ավելի վաղ NEWS.am-ը հայտնել էր, որ ռուսական Red Wings ավիաընկերությունը ՀՀ կառավարությանն առընթեր քաղաքացիական ավիացիայի գլխավոր վարչության կողմից ստացել է թույլտվություն՝ Մոսկվա («Դոմոդեդովո» օդանավակայան)- Երևան- Մոսկվա երթուղով կանոնավոր չվերթներ իրականացնելու համար:
Չվերթների մեկնարկը կտրվի մարտի 18-ին, որոնք մինչև ապրիլի 2-ը կիրականացվեն շաբաթական 4 չվերթ հաճախականությամբ, իսկ ապրիլի 3-ից չվերթները կիրականացվեն շաբաթական 7 չվերթ հաճախականությամբ:
