Որպես զենք կարող է օգտագործվել ցանկացած տեսակի տնտեսական-կենցաղային նշանակության առարկա, որը կարող է մարմնական վնասվածք հասցնել։ Այս մասին այսօր՝ մարտի 17-ին, Երեւանի ընդհանուր իրավասության դատարանի Շենգավիթի նստավայրում հայտարարեց Ժիրայր Սեֆիլյանի եւ մյուսների գործով մեղադրողը իր ռեպլիկի ընթացքում։
«Շատ կարեւոր են գործում առկա իրեղեն ապացույցները՝ մետաղյա ձողերը, փայտյա ձողերը, դանակները, որոնք պաշտպանական կողմից քննադատության արժանացան, թե ինչպես կարելի է դրանք զենք համարել եւ դրանով զինված ապստամբություն անել։ Իմաստազուրկ եմ համարում նման հարցադրումներին պատտասխանել»,- ասաց մեղադրողը։
Մեղադրողը հայտարարեց, որ դատաքննության ընթացքում Ժիրայր Սեֆիլյանը հրաժարվել է ցուցմունք տալուց, սակայն պաշտպանական կողմը ներկայացնում է, թե իբր դատարանը չի թույլատրել Ժիրայր Սեֆիլյանին ցուցմունք տալ։
Մեղադրողը հավելեց, որ ամբողջովին ապացուցված է Ժիրայր Սեֆիլյանի կողմից կազմակերպված խմբի մեղավորությունը ռազմավարական նշանակություն ունեցող շենք-շինություններ զավթելու մեջ։
Նշենք, որ այսօր Ժիրայր Սեֆիլյանին եւ մյուսներին հնարավորություն տրվեց հանդես գալ պաշտպանական ճառերով, ինչից հետո դատավորը կգնա խորհրդակցական սենյակ։
Հիշեցնենք, որ մեղադրող-դատախազը Սեֆիլյանի համար պահանջել է 11 տարվա ազատազրուկում, Գեւորգ Սաֆարյանի համար 4 տարի 6 ամիս, Ներսես Պողոսյանի համար` 4 տարի, Գալուստ Գրիգորյանի համար 3 տարի, Հրայր Թոփչյանի համար 3 տարի, Սասունիկ Կիրակոսյանի համար պահանջեց 4 տարի 6 ամիս, Հովհաննես Պետրոսյանի համար 2 տարվա ազատազրկում: Ժիրայր Սեֆիլյանը մեղադրվում է զանգվածային անկարգություններ կազմակերպելու եւ զենքի գործադրմամբ շենքեր, շինություններ զավթելու նախապատրաստության մեջ: