Մարտի 1-ի դեպքերի վերաբերյալ ԱԺ լսումների ժամանակ մարտի 1-ի դեպքերն ուսումնասիրած ԱԺ ժամանակավոր հանձնաժողովի նախագահ Սամվել Նիկոյանը հայտարարեց, որ մինչեւ օրս անհայտ է, թե ինչի հիման վրա է 2008 թվականի մարտի 1-ին Ռոբերտ Քոչարյանը Բաղրամյան 26-ում հայտարարել, թե այդ օրը ցուցարարները մեքենայի հետեւից կրակում էին զինվորների վրա եւ թաքնվում: Այս մասին, այսօր՝ մարտի 20-ին, ԱԺ-ում 2008 թվականի մարտի 1-2-ի իրադարձությունների վերաբերյալ ԱԺ հայտարարության նախագծի քննարկման ժամանակ նշեց նախագծի հեղինակ «Ելք» խմբակցության ղեկավար Նիկոլ Փաշինյանը:
Նրա խոսքով, լսումների ժամանակ դատախազության ներկայացուցիչը անարձագանք է թողել այդ հայտարարությունը:
«Այս հայտարարությունից հետո մենք դիմեցինք գլխավոր դատախազին, որպեսզի նա Ռոբերտ Քոչարյանին հարցաքննության կանչելու եւ այս կապակցությամբ պարզաբանումներ ստանալու նախաձեռնությամբ հանդես գա: Գլխավոր դատախազությունը մեր միջնորդությունը մերժեց, իսկ նախկին գլխավոր դատախազ, ներկայումս ԱԺ պետաիրավական հարցերի հանձնաժողովի նախագահ Գեւորգ Կոստանյանը հայտարարեց, թե նախաքննության մարմնի ձեռքի տակ կան Քոչարյանի ասածները հիմնավորող տեսանյութեր: Ուզում եմ պաշտոնապես մարտահրավեր նետել Կոստանյանի հայտարարությանը եւ պնդել, որ սա ստահոդ հայտարարություն է : Չկա նման տեսագրություն եւ չի կարող լինել: Եթե կա նման տեսագրություն, գլխավոր դատախազությունը թող հրապարակի այն: Նման տեսագրության գոյության անհնարինությունը փաստել է նաեւ Սամվել Նիկոյանը»,-հայտարարեց Փաշինյանը:
Ավելի վաղ NEWS.am-ը հայտնել էր, որ ըստ «Հայկական ժամանակ» թերթի, ՀՀ նախկին գլխավոր դատախազ Գեւորգ Կոստանյանը, անդրադառնալով Ռոբերտ Քոչարյանի այդ հայտարարությանը, նշել էր. «Նախագահը, եթե անում է հայտարարություն, ուրեմն ինքը հիմք է ընդունում կոնկրետ տեսաձայնագրություններ: Ես ասել եմ, որ բոլոր տեսաձայնագրությունները, որոնց մասին ընդհանրապես խոսվում է, որի հիման վրա հայտարարություններ են արվում, դրանք գտնվել եւ գտնվում են նախաքննության մարմնի տրամադրության տակ: Հետեւաբար, եթե մի հետեւություն արվում է տեսաձայնագրության հիման վրա, այդ հետեւությունը կարող է անել նախաքննության մարմինը առանց այդ տեսագրությունը դիտած տարբեր մարդկանց հարցաքննելու»:
