Մարդու իրավունքների պաշտպան Արման Թաթոյանն այսօր՝ մարտի 21-ին, հրաժարվել է տեսակետ հայտնել «Հիմնադիր խորհրդարանի» առաջնորդ Ժիրայր Սեֆիլյանի դատավճռի վերաբերյալ:
«Հոգեբուժական կազմակերպություններում հոգեկան առողջության խնդիրներ ունեցող անձանց իրավունքների ապահովման վերաբերյալ» արտահերթ զեկույցի թեմայով հրավիրված մամուլի ասուլիսի ժամանակ եւ դրանից հետո լրագրողները փորձեցին դատավճռի վերաբերյալ մեկնաբանություն ստանալ Արման Թաթոյանից, սակայն, վերջինս հրաժարվեց որեւէ մեկնաբանություն տալ:
«Ես առաջիկայում ներկայացնելու եմ տարեկան հաղորդում, որին նվիրվծ ասուլիսի ժամանակ պատրաստ եմ պատասխանել բոլոր հարցերին»,- ասաց օմբուդսմենը:
Հիշեցնենք, որ մարտի 20-ին «Հիմնադիր խորհրդարանի» առաջնորդ Ժիրայր Սեֆիլյանը դատապարտվեց 10 տարի 5 ամսվա ազատազրկման: Գեւորգ Սաֆարյանը դատապարտվեց 4 տարվա ազատազրկման, դրան գումարվեց առաջին դատավճռի 2 տարի ժամկետը եւ վերջնական պատիժ սահմանվեց 5 տարի 6 ամիս ազատազրկում: Գործով անցնող Ներսես Պողոսյանը դատապարտվեց 3 տարի 6 ամիս ժամկետով ազատազրկման, Գալուստ Գրիգորյանը՝ 3 տարի, Հրայր Թոփչյանը՝ 3 տարի, Սասունիկ Կիրակոսյանը՝ 3 տարի 6 ամիս, Հովհաննես Պետրոսյանը՝ 2 տարի ժամկետով ազատազրկման:
Սեֆիլյանի պաշտպանները հայտարարել են, որ սա քաղաքական հաշվեհարդար է: