ՀՀ նախկին գլխավոր դատախազ, ՄԻԵԴ-ում կառավարության ներկայացուցիչ, Աժ պետաիրավական հանձնաժողովի նախագահ Գեւորգ Կոստանյանն այսօր Ազգային Ժողովում լրագողների հետ զրույցում անդրադարձել է փաստաբան Վահե Գրիգորյանի հրապարակմանը, որի համաձայն՝ ՄԻԵԴ-ի հարցադրմանն ի պատասխան՝ Կոստանյանը նշել է, որ Մարտի 1-ին ոստիկանության կողմից ուժի կիրառումը «բացարձակ անհրաժեշտ» է եղել: Նշենք, որ Մարտի 1-ի գործով ՄԻԵԴ-ում փաստաբան Վահե Գրիգորյանը հրապարակել է այն փաստաթուղթը, որի ներքո Գեւորգ Կոստանյանի ստորագրությունն է:
Կոստանյանը լրագրողների հետ զրույցում շեշտել է, թե այդ «բացարձակ անհրաժեշտ»-ը չի վերաբերում 10 զոհերին:
«Երբ Եվրոպական դատարանը գործը վարույթ է ընդունում, առաջադրում է որոշակի հարցեր կողմերին, կառավարությանը եւ դիմումատուին: Մարտի 1-ի գործի դեպքում եւս կառավարությանն ուղղել է մի շարք հարցեր: Փաստաբանի կողմից հրապարակվել է կառավարության առարկության 55 էջից առաջինն ու վերջին էջերը: Առաջին էջում դատարանն է հարց տալիս հետեւյալ բովանդակությամբ. «Արդյո՞ք Մարտի 1-ի իրադարձություների ընթացքում ոստիկանության կողմից կիրառված ուժը եղել է բացարձակ անհրաժեշտ: Ընդ որում՝ բացարձակ անհրաժեշտ ձեւակերպումը չակերտում են օգտագործել: Եվրոպական դատարանի հարցադրումն է էդպիսին: Արդյո՞ք ոստիկանության կողմից կիրառված ուժը եղել է բացարձակ անհրաժեշտ եւ արդյո՞ք առաջացրել է 2-րդ հոդվածով իրավունքի խախտում, թե՝ ոչ: Դա կոնվենցիայի կանոն է, որ ֆիզիկական ուժը, որը պետական ծառայողի կողմից կիառում էքաղաքացու նկատմամաբ, պետք լինի համաչափ, իրավաչափ եւ բացարձակ անհրաժեշտ»,- մեկնաբանել է նախկին գլխավոր դատախազը:
Կոստանյանը շեշտել է, որ կառավարությունն առարկությունների 55 էջում հիմնավորել է, որ ոստիկանության կողմից բացարձակ անհրաժեշտ է եղել, որովհետեւ դա ուղղված էր հասարակական կարգի պահպանմանը:
«Ինչ վերաբերում է մահվանը, որը ես եմ ստորագրել: Այո, 55 էջի մեջ առանձին-առանձին բոլոր մահվան հանգամանքներին անդրադարձել ենք ու փաստել, որ մահվան փաստի կապակցությամբ հարուցված քրեական գործով քննությունը շարունակվում է եւ արվում են գործողություններ, որոնք կներկայացնենք ըստ հաջորդականության»,- նշել է նախկին գլխավոր դատախազը:
