Կառավարությունը մարտի 22-ի նիստում հաստատել է 6.57 հեկտար տարածքով բնակելի համալիրի շինարարության սոցիալ–ներդրումային ծրագիրը, որը տեղակայված կլինի Մոնթե Մելքոնյան փողոցի վրա։ Որոշման նախագիծը ներկայացրել է Երեւանի քաղաքապետ Տարոն Մարգարյանը։ 

Նա նշել է, որ ծրագիրը կիրականացնի «Երեւանի պետական համալսարանի շրջանավարտների միավորում» հասարակական կազմակերպությունը։ 457.3 մլն դրամ կադաստրային արժեքով տարածքը կօտարվի հօգուտ «Երեւանի պետական համալսարանի շրջանավարտների միավորման»՝ «Վերածնունդ» երիտասարդական ավանը կառուցելու նպատակով։

Քաղաքապետը պարզաբանել է, որ «Երեւանի պետական համալսարանի շրջանավարտների միավորում» հասարակական կազմակերպությունն իրականացնում է բնակարանային ապահովման սոցիալական ծրագրեր, որոնց շրջանակներում Երեւանում կառուցվում են բազմաֆունկցիոնալ բնակելի համալիրներ։ Բնակարանները տարբեր ոլորտի մասնագետներին վաճառվում են շուկայական գներից ցածր։

«Ըստ հիմնավորման, ներկայումս, հաշվի առնելով մատչելի պայմաններով բնակարան ձեռք բերելու մեծ պահանջարկը եւ շուրջ 1200 երիտասարդ ընտանիքների կողմից ներկայացված դիմումները, որոշվել է ընդլայնել բնակարանաշինական ծրագրերի շրջանակը եւ մատչելի պայմաններով բնակարան ձեռքբերելու հնարավորություն ընձեռնել բոլոր կարիքավոր դիմումատուներին»,–նշել է Մարգարյանը։ 

Բնակելի համալիրը ներառում է շուրջ 1000 բնակարան, կանաչ գոտի, մանկապարտեզ, կենցաղային ծառայությունների եւ հանրային նշանակության գոտիներ։ Նախագծի ընդհանուր ներդրումային արժեքը կազմել է շուրջ 52 մլրդ դրամ, իրականացման ժամկետը 40 ամիս է (2018 թվականի ապրիլի 1-ից 2021 թվականի հուլիսի 1–ը)։