Որեւէ փաստ չկա, որ գործող նախագահ Սերժ Սարգսյանը կորոշի «վերաորակավորվել» որպես վարչապետ։ Այս մասին մարտի 24-ին՝ լրագորողների հետ հանդիպման ժամանակ հայտարարել է Գերագույն խորհրդի նախկին պատգամավոր Ազատ Արշակյանը։
Նրա խոսքով, ավելի հավանական է, որ Սարգսյանը կարող է մնալ Անվտանգության խորհրդի եւ իշխող հանրապետական կուսակցության ղեկավարի պաշտոնում, իսկ վարչապետ կդառնա քաղաքական էլիտայի ավելի երիտասարդ ներկայացուցիչ։
«Ամեն դեպքում, վերջնական որոշումը կայացվելու է Մոսկվայում։ Այդպես է եղել միշտ։ Ռուսական կայսրության նահանգներում պետք է իրենց մարդը լինի»,-նշել է նա։
Սակայն, Ազատ Արշակյանի կարծիքով, Հայաստանում ավելի ժողովրդավարական քաղաքական համակարգ է գործում, քան Ռուսաստանում, սա որոշակի հակասություն է ստեղծում կենտրոնի եւ «նահանգի» միջեւ։ Միաժամանակ, նա հավելել է, որ ապագա նախագահը, ի տարբերություն վարչապետի, իրական իշխանություն չի ունենա, եւ նախագահը իրականում չի կարողանա ազդել երկրում ընթացող քաղաքական եւ սոցիալական գործընթացների վրա։
