Ucom ընկերությունը 2018 թվականին հեռահաղորդակցության ոլորտի ընկերությունների հասույթի ավելացում է ակնկալում։ Այս մասին NEWS.am–ի թղթակցի հետ զրույցում հայտարարել է ընկերության գլխավոր տնօրեն Հայկ Եսայանը։
Նրա խոսքով, հեռահաղորդակցության ծառայությունների շուկան Հայաստանում 3 տարի շարունակ անկում է ապրել ծառայությունների ծավալի փոփոխությունների պատճառով, սակայն 2017 թվականին նկատվել է այդ տեմպի կրճատում։
«Կարծում եմ, որ 2018 թվականին կորը վեր կբարձրանա, քանի որ նույնը տեղի է ունեցել այլ երկրներում՝ ԱՄՆ–ում եւ Եվրոպայի երկրներում, շուկայի «սմարթֆոնացման» հետ շուկան անկում է ապրել, ապա հասույթի կորը ավելացել է»,–նշել է ընկերության գլխավոր տնօրենը՝ հավելելով, որ Հայաստանում այդ գործընթացը դանդաղ է ընթացել, այդ պատճառով էլ անկումը ձգձգվել է»,–նշել է նա։
Ազգային վիճակագրական ծառայության տվյալներով (ՀՀ ԱՎԾ)՝ 2017 թվականի հունվար-սեպտեմբերին հեռահաղորդակցության ոլորտի օպերատորների բջջային կապից ստացված շահույթը կազմել է 46.7 մլրդ դրամ, այս ցուցանիշը 2016թ.-ի նույն ժամանակաշրջանի համեմատ 24.5 տոկոսով պակաս է։