25 երկրներ արդեն արտաքսել են ռուսաստանցի դիվանագետներին՝ «Անգլիայում նախկին ռուսական լրտեսի եւ նրա դստեր թունավորման գործին Մոսկվայի մեղսակցության» կապակցությամբ։ Այդ մասին հայտարարել է Մեծ Բրիտանիայի վարչապետ Թերեզա Մեյը՝ ելույթ ունենալով խորհրդարանում, հաղորդում է Reuters-ը։
«Ես ողջունում եմ միջազգային աջակցությունը, որ մենք ստացել ենք»,- ասել է Մեյը եւ հավելել. «Դա վերաբերում է ոչ միայն Մեծ Բրիտանիայի դիրքորոշմանը։ Կարծում եմ՝ դա կապված է համապատասխան երկրների ազգային անվտանգության շահերի հետ»։
Նա նկատել է, թե դեռ աշխատանք պետք է տանել օտարերկրյա գործընկերների հետ՝ «Ռուսաստանի մարտահրավերին «երկարաժամկետ պատասխանի» հասնելու համար։
Նշենք, որ Լոնդոնը մեղադրել է Մոսկվային Սկրիպալների թունավորման մեջ։ Մեծ Բրիտանիան արտաքսել է 23 դիվանագետների, դադարեցրել երկկողմ շփումները։ Ի նշան համերաշխության դիվանագետների են արտաքսել ԱՄՆ-ը, Կանադան, ԵՄ տասնյակ երկրներ։
