Սիրիական Արեւելյան Գուտան գրեթե ամբողջությամբ ազատված է ահաբեկիչներից, հայտարարել է Ռուսաստանի արտգործնախարար Սերգեյ Լավրովը, հաղորդում է «Ինտերֆաքսը»:
«Մենք ակնհայտ պատճառներով հատուկ ուշադրություն ենք դարձնում Սիրիայի հումանիտար իրավիճակի վրա: Արեւելյան Գուտայում ավարտված հակաահաբեկչական գործողությունների արդյունքում սիրիական մայրաքաղաքի այս արվարձանը գրեթե ամբողջովին ազատված է ահաբեկչական եւ ծայրահեղական տարրերից», - ՄԱԿ-ի հատուկ ներկայացուցիչ Ստաֆան դե Միստուրայի հետ բանակցություններից հետո ասել է Լավրովը:
Նրա խոսքով՝ Արեւելյան Գուտայի մոտ 90 տոկոսն անցել է կառավարական զորքերի հսկողության ներքո: «Այժմ զինյալների մեծ մասը տարհանվել է, խաղաղ կյանքը վերականգնվում է, Արեւելյան Գուտայի մոտ 90 տոկոսը անցել է կառավարական ուժերի վերահսկողության ներքո: Տեղահանված անձանց մարդասիրական օգնության տրամադրումը չափազանց կարեւոր է: Հուսով ենք, որ ՄԱԿ-ը ահաբեկիչների բռնաճնշման ենթարկված տարածքների բնակիչներին կաջակցի, որպեսզի խաղաղ բնակիչները հնարավորինս շուտ վերադառնան իրենց տները», - ասել է նախարարը:
