ՀՀ արտակարգ իրավիճակների նախարար Դավիթ Տոնոյանն ապրիլի 4-ին ընդունել է Հայաստանի Հանրապետությունում Ռուսաստանի Դաշնության արտակարգ եւ լիազոր դեսպան Իվան Վոլինկինին, ով ավարտում է իր դիվանագիտական առաքելությունը Հայաստանում:
ԱԻՆ-ից NEWS.am-ին հայտնում են, որ շնորհակալություն հայտնելով համատեղ աշխատանքի համար՝ նախարար Տոնոյանը բարձր գնահատեց հայ-ռուսական համագործակցությունը արտակարգ իրավիճակների ոլորտում՝ որպես սերտ համագործակցության ձեռքբերում նշելով դեսպանի պաշտոնավարման օրոք Հայ-ռուսական մարդասիրական արձագանքման կենտրոնի ստեղծումը եւ ակտիվ գործունեությունը: «Հայ-ռուսական մարդասիրական արձագանքման կենտրոնը մեծ դերակատարում ունի աղետների ռիսկի նվազեցման գործընթացում ոչ միայն Հայաստանի տարածքում, այլեւ՝ տարածաշրջանային մակարդակով»,-ընդգծեց ԱԻ նախարարը:
Արձագանքելով դեսպան Վոլինկինը շնորհակալություն հայտնեց կառուցողական համագործակցության համար եւ վստահություն հայտնեց, որ այն շարունակվելու եւ ընդլայնվելու է:
Կողմերը քննարկեցին նաեւ սեյսմոլոգիայի, գեոֆիզիկայի, հիդրոօդերեւութաբանության եւ կլիմայի փոփոխության բնագավառում համագործակցության շարունակականության ապահովման հնարավորությունները, ինչպես նաեւ՝ ՀՀ ԱԻՆ աշխատակազմի փրկարար ծառայության եւ Հայաստանում տեղակայված Ռուսաստանի Դաշնության 102-րդ ռազմաբազայի, Հայաստանում տեղակայված Ռուսաստանի անվտանգության դաշնային ծառայության վարչության համատեղ ուսումնավարժությունների եւ աղետներին արձագանքման պլանների իրագործումը:
Հանդիպման ավարտին ԱԻ նախարարը ռուսական կողմին հրավիրեց մասնակցելու այս տարի դեկտեմբերի 5-ից 7-ը մեր երկրում «Դիմակայուն Հայաստան» խորագրի ներքո անցկացվող Սպիտակի երկրաշարժի հիշատակման 30-րդ տարելիցին նվիրված միջոցառումներին, որոնց շրջանակում իրականցվելու են՝ միջազգային համաժողով, համապետական վարժանք եւ Դաշտային խոհանոցի միջազգային մրցույթ: