Իրաքի Գերագույն դաշնային դատարանը մայիսի սկզբին Քուրդիստանից նավթի արտահանման օրինականության մասին լսումներ կսկսի, հաղորդում է Reuters-ը:
Նավթի տարաձայնությունները հիմնական խոչընդոտն է Կենտրոնական կառավարության եւ Իրաքի Քուրդիստանի միջեւ հարաբերությունների կարգավորման համար: Քուրդիստանն անցյալ տարվա հոկտեմբերին անկախության հանրաքվե անցկացրեց՝ չնայած Բաղդադի դիմադրությանը:
Գերագույն դաշնային դատարանը հայտարարել է, որ մայիսի 6-ին կլսի պաշտոնյաների, այդ թվում` կենտրոնական կառավարության վարչապետի, Իրաքի նավթի նախարարի եւ ֆինանսների նախարարի, ինչպես նաեւ Իրաքի Քուրդիստանի կառավարության ղեկավարի տեսակետները:
Իրաքի նավթի նախարար Ջաբար ալ Լուաիբին դատարանին խնդրել է արգելել Իրաքի Քուրդիստանից նավթի անկախ արտահանումը, որը սկսվել է 2014 թվականին Թուրքիայի տարածքի խողովակաշարով:
Էրբիլը պնդում է, որ Իրաքի Սահմանադրությունը ճանաչում է Քուրդիստանի օրինականությունը եւ չի պարունակում հոդվածներ, որոնք արգելում են նրան նավթային ռեսուրսներ մշակել իր տարածքում:
