Պետք է մեր եվրոպացի գործընկերները հասկանան, որ չի կարելի «Արեւելյան գործընկերությունը» տրոհել սիրված երեխաների եւ վերցնովի քաղաքական զավակների: Այս մասին, այսօր՝ ապրիլի 10-ին, ԱԺ-ում «Հայաստանի Հանրապետության` մի կողմից, Եվրոպական միության եւ ատոմային էներգիայի եվրոպական համայնքի ու դրանց անդամ պետությունների` մյուս կողմից, միջեւ համապարփակ եւ ընդլայնված գործընկերության» համաձայնագիրը վավերացնելու մասին» օրենքի նախագծի քննարկման ժամանակ նշեց ԱԺ արտաքին հարաբերությունների հանձնաժողովի նախագահ Արմեն Աշոտյանը:
«Այո, Հայաստանի դեպքում սա ասոցացման համաձայնագիր չէ: Համաձայնագրի քաղաքական մասն ամբողջությամբ ընդգրկում է ասոցացման համաձայնագիրը: Կան տարբերություններ առեւտրային ռեժիմների հետ կապված, ինչը բնական է: Կարեւոր է պահպանել ԵՏՄ-ի առջեւ մեր ստանձնած պարտավորությունները, որպեսզի շարունակենք դիտարկվել որպես վստահելի գործընկեր»,-ասաց Աշոտյանը:
Նրա խոսքով, Հայաստանը բարեփոխումների մեջ պակաս չէ այն երկրներից, երբեմն նույնիսկ ավել է, որոնք ասոցացման համաձայնագիր են կնքել ԵՄ-ի հետ. «Պետք է դիտարկել Արեւելյան գործընկերության երկրներին իրենց կատարած աշխատանքով, ոչ թե նախընտրություններ ունենալ: Չի կարելի երկրներին տրոհել բարձր խմբի եւ առաջին խմբի: Հայաստանն իր հաջողության պատմություններով իրեն դասում է բարձրագույն լիգայի մեջ: Սա բազմաթիվ չափումներով ապացուցված իրականություն է»,-ընդգծեց Աշոտյանը: