ԵՊՀ ռեկտոր Արամ Սիմոնյանն այդպես էլ դուրս չեկավ հանդիպելու «Ելք» խմբակցության պատգամավոր Նիկոլ Փաշինյանի գլխավորած «Իմ քայլը» եւ «Մերժիր Սերժին» նախաձեռնության անդամներին:
Ակցիայի մասնակիցները սուլոցներով եւ ծափողջյուններով ողջունեցին ԵՊՀ ուսանողներին, եւս մեկ անգամ իրազեկեցին այսօր 18:30-ին Ազատության հրապարակում նախատեսված հանրահավաքի մասին եւ դուրս եկան շենքից:
«Մենք այսօր արձանագրեցինք, որ սա Սերժ Սարգսյանի եւ Արամ Սիմոնյանի պետական համալսարանը չի, սա ՀՀ պետական համալսարանն է, եւ թող ոչ ոք չփորձի մեր առջեւ դռներ փակել, լինի դա ԱԺ, նախագահականի կամ կառավարության դուռը»,- հայտարարեց Փաշինյանը:
Ակցիայի մասնակիցները մի փոքր հանգստանալուց հետո իրենց ճանապարհը կշարունակեն դեպի Ազատության հրապարակ:
Ավելի վաղ NEWS.am-ը հայտնել էր, որ այսօր առավոտյան մի խումբ ուսանողներ դասադուլ են հայտարարել, ապա գնացել դիմավորելու քայլերթով Երեւան մտնող Նիկոլ Փաշինյանին ու նրա աջակիցներին:
Նշենք, որ «Քաղաքացիական պայմանագիր» կուսակցությունը՝ Նիկոլ Փաշինյանի գլխավորությամբ, մարտի 31-ից քայլարշավ է սկսել Հայաստանի քաղաքներով, որը կավարտվի ապրիլի 13-ին Ազատության հրապարակում շուրջօրյա հանրահավաքներով: Նանք հայտարարել են, որ մտադիր են ապրիլի 17-ին շրջափակել ԱԺ շենքը, նաեւ պատգամավորների տները եւ թույլ չտալ, որ նրանք մասնակցել ԱԺ-ում վարչապետի ընտրությանը: «Ելք» դաշինքի մյուս երկու կուսակցությունները՝ «Լուսավոր հայաստանը» եւ «Հանրապետությունը» չեն միացել այս պայքարին: