Հետաքննության դաշնային բյուրոյի (ՀԴԲ) տնօրեն Ջեյմս Կոմիի պաշտոնանկությունը Ամերիկայի առաջնորդ Դոնալդ Թրամփի ամենամեծ նվաճումներից մեկն է: Այս մասին ուրբաթ լրագրողների համար ճեպազրույցում ասել է Սպիտակ տան մամուլի քարտուղար Սառա Սանդերսը, հաղորդում է ՏԱՍՍ-ը:
Իր հերթին, Թրամփը ուրբաթ կրկին քննադատել է Կոմիին, հիշեցնելով, որ նա ստել է եւ արտահոսքեր է թույլ տվել:
Կոմին իր հուշերում, որոնք կհրապարակվեն հաջորդ շաբաթ, վիրավորական հատկանիշներ է տալիս Թրամփին եւ իր հետ զրույցների մանրամասներն է ներկայացնում:
Հինգշաբթի Associated Press-ը, որի տրամադրության տակ են հայտնվել «Բարձրագույն հավատարմություն. ճշմարտություն, սուտ եւ առաջնորդություն» վերնագրով հուշերի կրկնօրինակները, հաղորդել էր, որ ՀԴԲ-ի նախկին ղեկավարը, Թրամփին «անազնիվ մարդ» է անվանում, իսկ նրա առաջնորդության ոճը նկարագրվում է որպես «եսասիրությամբ թելադրված» եւ «անձնական հավատարմություն» ակնկալիքի վրա հիմնված:
