ՀՀ բնապահպանության նախարարի պաշտոնակատար Արծվիկ Մինասյանի գլխավորած աշխատանքային խումբը եղել է ՀՀ Տավուշի մարզում, ուր այցելել է Հայաստանում կովկասյան ազնվացեղ եղջերուի վերաբնակեցման ծրագրի շրջանակներում «Դիլիջան» ազգային պարկում կառուցված եղջերուների բազմացման կենտրոն՝ Իրանի Իսլամական Հանրապետությունից ներմուծված 3 եղջերուի պահպանման պայմաններին ծանոթանալու նպատակով։
Նախարարությունից NEWS.am-ին հայտնում են, որ Կովկասյան ազնվացեղ եղջերուներն այս տարվա մարտ ամսին էին տեղափոխվել «Դիլիջան» ազգային պարկ՝ Հայաստանում տվյալ կենդանատեսակի պոպուլյացիայի վերականգնման նպատակով։ Շուրջ մեկ ամիս կենդանիները գտնվել են կարանտինի մեջ։ Ներմուծված կենդանիներից երկուսը էգ են, մեկը՝ արու։ Եղջերուների հաջորդ խմբի տեղափոխումը նախատեսվում է 2018թ․ երկրորդ կեսին։
«Հայաստանում Կովկասյան ազնվացեղ եղջերուի վերաբնակեցման ծրագիրը» 2013 թ․-ին նախաձեռնել են ՀՀ բնապահպանության նախարարությունը եւ Բնության համաշխարհային հիմնադրամի (WWF) հայաստանյան մասնաճյուղը։
ՀՀ բնապահպանության նախարարի պաշտոնակատար Արծվիկ Մինասյանը շնորհավորել է բոլորին կենդանիների ներմուծման փաստի առիթով եւ այն կարեւոր իրադարձություն է համարել, քանի որ երկար տարիներ կովկասյան ազնվացեղ եղջերուն բացակայում էր Հայաստանի լեռնաշխարհից եւ անտառներից։
«Այսօր շնորհիվ ՀՀ կառավարության, Բնության համաշխարհային հիմնադրամի հայաստանյան գրասնյակի /WWF/, Կովկասի բնության հիմնադրամի (CNF) արդեն ունենք եղջերուների առաջին խմբաքանակը եւ նախատեսվում է նրանց թիվն շատացնել ոչ միայն բնական՝ բազմացման ճանապարհով, այլ նաեւ Ռուսաստանի Դաշնությունից եւ Վրաստանից լրացուցիչ խմբաքանակներ բերելու շնորհիվ։ Համաձայնություն է ձեռք բերվել նաեւ «Գագիկ Ծառուկյան» հիմնադրամի հետ՝ եվրոպական եղջերուների էգ առանձնյակներ ներմուծելու գործընթաց սկսելու վերաբերյալ։ Մեր բնաշխարհին սպասվում է ակտիվ վերականգնման շրջան՝ սրտացավ եւ նվիրված աշխատանքի շնորհիվ։ Իսկ այդ հաջողությունը մեր բոլորինն է, առաջին հերթին՝ ՀՀ քաղաքացունը, որովհետեւ ունենալով պաշտպանված շրջակա միջավայր, կենդանական աշխարհի հազվագյուտ տեսակների թվի աճ՝ կունենանք միջազգային հեղինակության աճ է եւ մեր երկիր լրացուցիչ ներդրումների ավելացում»,- իր խոսքում նշել է ՀՀ բնապահպանության նախարարի պաշտոնակատարը։
Արծվիկ Մինասյանը նաեւ գոհունակությամբ արձանագրել է, որ որսահանդակների նկատմամբ քաղաքականության փոփոխությունը տվել է իր դրական արդյունքները։
Մասնավորապես՝ նախորդ տարի «Խոսրովի անտառ» պետական արգելոցում արձանագրված հրդեհի հետեւանքով արգելվել էր հարակից տարածքներում որսը, ինչի արդյունքում պետական արգելոցում արդեն այս տարի արձանագրվեց կովկասյան ընձառյուծի ներկայությունը։ Ըստ Ա․ Մինասյանի՝ առաջիկայում ավելի շատ տարածքներում են արգելվելու որսը եւ ուժեղացվելու հսկողությունը, որպեսզի Էկոմիջանցքները եւ դրանց հարակից տարածքները վայրի կենդանիների համար ավելի անվտանգ դառնան։
Բնության համաշխարհային հիմնադրամի հայաստանյան գրասենյակի տնօրեն Կարեն Մանվելյանը տեղեկացրել է, որ եղջերուների բազմացման կենտրոնը մեկ հեկտար է, որտեղ պահպանվելու է եղջերուների մայրական կազմը՝ 3-4 արու եւ 10-11 էգ։ Ակնկալվում է, որ ամեն տարի կենտրոնում կունենան 9-10 ձագ, որոնք կտեղափոխվեն 9 հեկտար տարածքով ազատավանդակ, որտեղ կբացառվի նրանց շփումը մարդկանց հետ եւ մոտավորապես 3 տարուց եղջերուների վրա կտեղադրվեն ռադիոորսակներ /անվտանգությունն ապահովելու համար/ եւ նրանք բաց կթողնվեն վայրի բնություն։ Կ․ Մանվելյանը տեղեկացրել է, որ ազատավանդակները Էլեկտրական ցանկապատ ունեն՝ գիշատիչներից պաշտպանելու համար։ Բանախոսը նաեւ տեղեկացրել է, որ կովկասյան ազնվացեղ եղջերուն Հայաստանում համարվում է վերացված տեսակ եւ, բնապահպանության նախարարի պաշտոնակատար Արծվիկ Մինասյանի անմիջական միջամտության շնորհիվ Իրանից առանձնյակների ներմուծմամբ, նրանց վերականգնման սկիզբ է դրվում։
