Երեւանի պետհամալսարանից սկիզբ առաջ երթը անցնելով մի շարք փողոցներով, հասել է Տիգրան Մեծի պողոտա: «Ռոսիա» կինոթատրոնի մոտ երթի առաջին շարքում շղթա կազմեցին զինվորական համազգեստով ցուցարարներ: Նրանց համազգեստի վրա գրված է. «Հայաստանի խաղաղապահ ուժեր»:
Զինվորական հագուստով երիտասարդները նշել են, որ եկել են զորամասերից մեկից. Նրանք երգեցին Հայաստանի հիմնը: Երթն ուղեկցում են նաեւ հոգեւորականներ:
Մեկ այլ երթ այս պահին հասել է Բաղրամյան պողոտա, որտեղ ոստիկանները փշալարեր են տեղադրել եւ փակել ճանապարհը: Ցուցարարները հանդարտ կանգնած են փշալարերի դիմաց:
Նշենք, որ այս պահին բողոքի մեծ ու փոքր ակցիաներ են ընթանում քաղաքի տարբեր հատվածներում: Մի խումբ ցուցարարներ առավոտյան փակել էին Կորյուն-Տերյան փողոցների խաչմերուկը: Բժշկական համալսարանի ուսանողներն էլ բողոքի ակցիա էին իրականացրել Աբովյան-Հերացի հատվածում, որտեղ նրանց դեմ ոստիկանները ուժ են կիրառել եւ մի քանիսին բերման ենթարկել: Ցուցարարների են բերման ենթարկել նաեւ Ազատության պողոտայում տեղի ունեցած ակցիայից:
Բողոքի ակցիաներ են ընթանում նաեւ Վանաձոր, Գյումրի, Սեւան, Հրազդան քաղաքներում:
Հիշեցնենք, որ այսօր Սերժ Սարգսյանի վարչապետության դեմ ընթացող զանգվածային բողոքի ցույցերի 11-րդ օրն է: Երեկ՝ ապրիլի 22-ին, վարչապետ Սերժ Սարգսյանի եւ «Իմ քայլը» նախաձեռնության ու «Քաղաքացիական պայմանագիր» կուսակցության առաջնորդ Նիկոլ Փաշինյանի հանդիպումից մեկ ժամ անց ոստիկանությունը ուժ կիրառեց Արցախի փողոցում հավաքված ցուցարարների նկատմամբ, բերման ենթարկեց տասնյակ մարդկանց, այդ թվում՝ ԱԺ պատգամավորներ Նիկոլ Փաշինյանին, Արարատ Միրզոյանին եւ Սասուն Միքայելյանին։ Ավելի ուշ նրանց երեքին ձերբակալել են: Նիկոլ Փաշինյանի գտնվելու վայրն այս պահին անհայտ է:
Նշենք, որ գիշերը ժամը 00.00-ի դրությամբ բերման ենթարկվածների թիվը հասել է 315-ի:
