Այս պահին «Իմ քայլը» նախաձեռնության եւ «Քաղաքացիական պայմանագիր» կուսակցության առաջնորդ Նիկոլ Փաշինյանը Տիգրան Մեծի պողոտայում գտնվող երթի հետ է: Նրանք շարժվում են դեպի Հանրապետության հրապարակ: Փաշինյանին միացավ նաեւ նրա կինը՝ Աննա Հակոբյանը:
Մյուս բազմամարդ երթը գտնվում է Իսակովի պողոտայում:
Նա նշեց, որ ակնհայտ է, որ իրենց ազատ արձակեցին ժողովրդական ճնշման ներքո. «Այսօր հանրահավաքում բոլոր հարցերի պատասխանները կստանաք: Եսմ 1-2 ժամ մեկնաբանություն չեմ անի: Մի հատ հասկանանք՝ երբ ենք հանրահավաքը սկսում, այնտեղ բոլոր հարցերի պատասխանները կտամ»,-ընդգծեց Փաշինյանը:
Նշենք, որ քիչ առաջ Երեւան քաղաքի Ձերբակալվածների պահման վայրից ազատ են արձակվել «Ելք» խմբակցության պատգամավորներ, «Քաղաքացիական պայմանագիր» կուսակցության անդամներ Նիկոլ Փաշինյանը, Արարատ Միրզոյանը եւ Սասուն Միքայելյանը:
Նշենք, որ այսօր առավոտից բողոքի մեծ ու փոքր ակցիաներ են ընթանում քաղաքի տարբեր հատվածներում: Բողոքի ակցիաներ են ընթանում նաեւ Վանաձոր, Գյումրի, Սեւան, Հրազդան քաղաքներում: Վանաձորում գործադուլ եւ դասադուլ է:
Գագարինի հատվածում ցուցարարները փակել են Երեւան-Սեւան մայրուղին:
Հիշեցնենք, որ այսօր Սերժ Սարգսյանի վարչապետության դեմ ընթացող զանգվածային բողոքի ցույցերի 11-րդ օրն է: Երեկ՝ ապրիլի 22-ին, վարչապետ Սերժ Սարգսյանի եւ «Իմ քայլը» նախաձեռնության ու «Քաղաքացիական պայմանագիր» կուսակցության առաջնորդ Նիկոլ Փաշինյանի հանդիպումից մեկ ժամ անց ոստիկանությունը ուժ կիրառեց Արցախի փողոցում հավաքված ցուցարարների նկատմամբ, բերման ենթարկեց տասնյակ մարդկանց, այդ թվում՝ ԱԺ պատգամավորներ Նիկոլ Փաշինյանին, Արարատ Միրզոյանին եւ Սասուն Միքայելյանին։ Ավելի ուշ նրանց երեքին ձերբակալել են: