Գյումրիում եւս բողոքի ակցիաներ են տեղի ունենում, այդ թվում գործադուլ եւ դասադուլ. ցուցարարները մեծ երթով շարժվում են Գյումրիի կենտրոնական փողոցներով: Նրանք վանկարկում են՝ «դասադուլ», «Մերժիր Սերժին, Կարենին», «միացեք»: Բողոքի ակցիային են միացել Գյումրիի թիվ 1 պոլիկլինիկայի բժիշկներն ու բուժաշխատողները, ուսանողներ:
Հատկանշական է, որ ցուցարարների հետ է նաեւ «Ծառուկյան» դաշինքի ցուցակով ԱԺ պատգամավոր դարձած Գյումրիի նախկին քաղաքապետ Վարդան Ղուկասյանը: Հիշեցնենք, որ նա ժամանակին ՀՀԿ անդամ էր: Վարդան Ղուկասյանը գյումրեցիներին կոչ է անում մասնակցել բողոքի գործողություններին:
Նշենք, որ այսօր ԲՀԿ-ն հանդես է եկել հայտարարությամբ, որտեղ կոչ է արել իր բոլոր կուսակիցներին հանրապետության բոլոր մարզերում եւ մայրաքաղաք Երեւանում մոբիլիզացվել եւ դուրս գալ փողոց, լինել ժողովրդի կողքին:
Հիշեցնենք, որ ԱԺ պատգամավոր, «Իմ քայլը» նախաձեռնության առաջնորդ Նիկոլ Փաշինյանի գլխավորած շարժման 11 օր տեւած բողոքի ակցիաներից հետո, ապրիլի 23-ին Սերժ Սարգսյանը հրաժարական է տվել:
Փաշինյանը հայտարարել էր, որ ապրիլի 25-ին իշխանությունների հետ շարունակելու են բանակցությունները՝ իշխանության անցնցում փոխանցման շուրջ, սակայն ապրիլի 24-ի երեկոյան պարզ դարձավ, որ հանդիպումը չի կայանա: Կարեն Կարապետյանը հայտարարել է, որ Փաշինյանը միակողմանի նոր պահանջներ է առաջադրել: Փաշինյանն իր հերթին հայտարարել է, որ վերսկսում են բողոքի գործողությունները, քանի որ ՀՀԿ-ն Սերժ Սարգսյանի հրաժարականի գնով ուզում է պահպանել իշխանությունը:
