Հյուսիսային Կորեայի առաջնորդ Կիմ Չեն Ընն ինքն է հիշեցրել Կորեայի Հանրապետության նախագահ Մուն Չժե Ինին հարավկորեական Յոնփհյոնդո կղզու վրա տեղի ունեցած միջադեպի մասին, երբ 2010 թվականին այն գնդակոծվել էր Հյուսիսից։ Այս մասին լրագրողների հետ ճեպազրույցի ժամանակ հայտնել է Կորեայի Հանրապետության վարչակազմի ներկայացուցիչը, փոխանցում է «ՌԻԱ Նովոստի»–ն։
«Լավ կլիներ, եթե Հյուսիսի եւ Հարավի միջեւ այս արժեքավոր առիթով վերքերը բժշկվեին»,–ասել է Կիմ Չեն Ընը։
Հիշեցնենք, որ 2010 թվականին Յոնփհյոնդո կղզին, որը տեղակայված է Դեղին ծովի հյուսիսկորեական Կալդո կղզուց ընդամենը 4.5 կիլոմետր հեռավորության վրա, գնդակոծվել էր Հյուսիսային Կորեայի բանակի կողմից։ Սա տեղի էր ունեցել Հարավային Կորեայի զորավարժությունների ժամանակ։ Գնդակոծման հետեւանքով զոհվել էին երկու հարավկորեացի զինվորներ, 17-ն էլ վիրավորվել էին։