Մենք այս պահից կոչ ենք անում բոլոր քաղաքացիներին մայիսի 1-ին, առավոտյան ժամը 8-ին լինել Երեւանում, հեղեղել Երեւանի փողոցներն ու հրապարակները, այդ թվում ԱԺ-ի հարակից փողոցները: Այս մասին, այսօր՝ ապրիլի 27-ին, «Մարիոթ» հյուրանոցում հայտարարեց ԱԺ «Ելք» խմբակցության պատգամավոր, «Իմ քայլը» նախաձեռնության առաջնորդ Նիկոլ Փաշինյանը:
Անդրադառնալով ՀՅԴ-ի եւ «Ծառուկյան» դաշինքի՝ շարժմանը միանալու հարցին, Փաշինյանն ասաց, որ հույս ունի, որ այդ երկու ուժերը մինչեւ մայիսի 1-ը կկողմոնորշվեն, թե ինչպես են քվեարկելու:
Ինչ վերաբերում է նրան, որ վարչապետի պաշտոնակատար Կարեն Կարապետյանն այսօր չէր եկել իր հրավիրած հանդիպմանը, Փաշինյանն ասաց. «Դա նշանակում է, որ ՀՀԿ-ում լիակատար խառնաշփոթ վիճակ է, որովհետեւ երեկ նրանք հայտարարում էին, որ պատրաստ են բանակցությունների առանց որեւէ նախապայմանների, բայց ինչպես տեսնում եք Կարեն Կարապետյանի տեղը հիմա զբաղեցնում է իմ ուսապարկը»
«Մեր դիրքորոշումը հայտնի է, մենք կարծում ենք, որ ժողովրդի հաղթանակը պետք է արձանագրվի նաեւ դե յուրե: Այսինքն հարցն այն է՝ արդյոք ՀՀԿ-ն ուզո՞ւմ է լուծել ճգնաժամը: Եթե վարչապետ ընտրվի ՀՀԿ-ական, ապա ճգնաժամը լուծում չի ստանա: Մենք կշարունակենք մեր խաղաղ գործողությունները եւ կփորձենք բացատրել ՀՀԿ-ականներին, նաեւ Կարեն Կարապետյանին, ինչպես բացատրեցինք Սերժ Սարգսյանին, որ չեն հասկանում Հայաստանում ստեղված քաղաքական իրավիճակը: Ես կարծում եմ Կարեն Կարապետյանը վստահ չէ իր բանակցային ուժերին, իսկ եթե վստահ չէ իր բանակցային ուժերին, ինչպե՞ս է նա պատրաստվում բանակցել Ղարաբաղի հարցում»:
Դիտարկմանը, որ վարչապետ ընտրվելու համար իրեն կարող է չբավարարել մանդատները, Նիկոլ Փաշինյանն արձագանքեց. «Կարծում եմ, մենք ունենք գլխավոր մանդատը՝ Հայաստանի եւ սփյուռքի հայ ժողովրդի մանդատը: Հազարավոր մարդիկ Ռուսաստանից, Եվրոպայից, Ամերիկայից գալիս են ու մասնակցում հանրահավաքներին: Նրանք ուզում են այնպիսի փոփոխություններ, որ հնարավորություն ունենան վերադառնալ, ապրել բիզնես անել Հայաստանում: Սա գլխավոր մանդատն է, ԱԺ-ն պետք է հաշվի առնի ժողովրդի կամքը»:
Հիշեցնենք, որ ԱԺ պատգամավոր, «Իմ քայլը» նախաձեռնության առաջնորդ Նիկոլ Փաշինյանի գլխավորած շարժման 11 օր տեւած բողոքի ակցիաներից հետո, ապրիլի 23-ին Սերժ Սարգսյանը հրաժարական է տվել:
Փաշինյանը հայտարարել էր, որ ապրիլի 25-ին իշխանությունների հետ շարունակելու են բանակցությունները՝ իշխանության անցնցում փոխանցման շուրջ, սակայն ապրիլի 24-ի երեկոյան պարզ դարձավ, որ հանդիպումը չի կայանա: Կարեն Կարապետյանը հայտարարել է, որ Փաշինյանը միակողմանի նոր պահանջներ է առաջադրել: Փաշինյանն իր հերթին հայտարարել է, որ վերսկսում են բողոքի գործողությունները, քանի որ ՀՀԿ-ն Սերժ Սարգսյանի հրաժարականի գնով ուզում է պահպանել իշխանությունը:
Արդեն երեկ՝ ապրիլի 26-ին, Փաշինյանը Կարեն Կարապետյանին հրավիրել էր ապրիլի 27-ին, ժամը 12-ին «Արմենիա Մարիոթ» հյուրանոցում՝ սկսելու բանակցությունների երկրորդ փուլը:
Վարչապետի պաշտոնակատար Կարեն Կարապետյանի մամուլի խոսնակ Արամ Արարատյաննն այսօր հայտարարել է, որ Կարեն Կարապետյանն անհեռանկարային է համարում Նիկոլ Փաշինյանի հետ «բանակցությունները»՝ մերժելով հանդիպումը: