Այս պահին Նիկոլ Փաշինյանն ապացուցեց, որ ՀՀ իշխանությունների վարած արտաքին քաղաքականությունը բխում էր պետական շահերից: Այս մասին այսօր՝ ապրիլի 30-ին, ԱԺ-ում ՀՀԿ խմբակցության նիստում վարչապետի թեկնածու Նիկոլ Փաշինյանի հետ հանդիպման ժամանակ նշեց ԱԺ փոխնախագահ, ՀՀԿ մամուլի քարտուղար Էդուարդ Շարմազանովը:
Նա դիմելով Փաշինյանին՝ հարցրեց. «Գաղտնիք չէ, որ «Ելք»-ը տարիներ շարունակ քննադատել է ՀՀԿ-ի արտաքին քաղաքականությունը, երբեմն խիստ, մասնավորպես՝ ԵՏՄ-ի անդամակցության համար, նաև նախաձեռնել գործընթաց դուրս գալու համար: Դւք համարել եք, որ ԵՏՄ անդամակցությունը մեր արտաքին քաղաքականության սխալներից մեկն էր: Ես ցանկանում եմ անկեղծորեն հարց տալ, հիմա մենք Նիկոլ Փաշինյանի ո՞ր ասածներին հավատանք, վարչապետի թեկնածու Նիկոլ Փաշինյանի՞, թե՞ ընդդիմադիր պատգամավոր Նիկոլ Փաշինյանի, և արդյոք վարչապետի թեկանծուի քայլը կտարբերվե՞ր ընդդիմադիր պատգամավորի քայլերից: Հնարավո՞ր է, որ էլի լինեն հարցեր, որտեղ 180 աստիճանով Փաշինյանի գործունեությունը կտարբերվի «Ելք»-ի դիրքորոշումից»:
Ի պատասխան Նիկոլ Փաշինյանը նշեց, որ վերջին օրերին ինքը հստակ ասել է, որ ՀՀ-ն դուրս չի գա ԵՏՄ-ից: «Ես ինքս դեմ եմ քվեարկել Հայաստանի՝ ԵՏՄ անդամակցությանը: Այդուհանդերձ, Հայաստանն արդեն ԵՏՄ անդամ է, եւ մենք լինելով պետական, քաղաքական գործիչներ, պետք է հաշվի նստենք փաստերի հետ: Արտաքին քաղաքականության ոլորտում կտրուկ շրջադարձերը շատ վտանգավոր կարող են լինել երկրի համար: Քաղաքական գործիչները պետք է առաջնորդվեն ազգային շահերով, ոչ թե իրենց քմահաճույքներով»:
Ինչ վերաբերում է ԵՏՄ-ից դուրս գալու վերաբերյալ իր հայտարարությանը, Փաշինյանն ասաց. «Ես նշել եմ, որ երբ դու ընդդիմության ներկայացուցիչ ես, դու հնարավորություն չունես այն խնդիրները, որոնք կան, քննարկել քո դրսի գործընկերների հետ: Նույն հիմնավորումներով, այո վարչապետ ընտրվելու պարագայում ԵՏՄ անդամակցությունը դադարեցնելու հարց չի բարձրացվելու: Այո, կան խնդիրներ այդ կառույցում եւ կաշխատենք այդ հարցերը լուծելու ուղղությամբ»:
Էդուարդ Շարմազանովն էլ նշեց, որ Փաշինյանի պատասխանն իրեն չհամոզեց. «Ինձ չհամոզեք, որովհետեւ ես այն կարծիքին չեմ, որ ընդդիմության ներկայացուցչի խոսքը պետք է պակաս պատասխանատու լինի, քան իշխանության: Միայն իշխանությունը չի առաջնորդվում պետական շահերով: Դուք ապացուցեիք, որ ՀՀ արտաքին քաղաքականությունը բխում է Հայաստանի ազգային շահերից»:
