Ազգային ժողովը չկարողացավ վարչապետ ընտրել. այդ հարցով հրավիրված հատուկ նիստում «Իմ քայլը» նախաձեռնության առաջնորդ, «Ելք»-ի կողմից առաջադրված թեկնածու Նիկոլ Փաշինյանի օգտին քվեարկեց 45 պատգամավոր, դեմ՝ 56, ձեռնպահ քվեարկելու հնարավորություն չկար:
Նշենք, որ քվեարկությանը նախորդեցին երկարատեւ քննարկումներն ու ելույթները, մեծ մասը՝ էմոցիոնալ: Հետո արդեն խմբակցությունները հայտարարեցին իրենց վերջնական որոշումների մասին: Հանրապետական խմբակցությունը որոշում էր կայացրել դեմ քվեարկել Փաշինյանի թեկնածությանը, սակայն օրեր շարունակ հայտարարված միասնականությունն ապահովել այնքան էլ չհաջողվեց. ՀՀԿ-ից Ֆելիքս Ցոլակյանը կողմ քվեարկեց Փաշինյանին, իսկ խմբակցության մեկ այլ պատգամավոր՝ Գրիգոր Ավալյանը, չէր ներկայացել նիստին: Ավելի ուշ ռեյտինգային ընտրակարգով Տավուշի մարզից պատգամավոր ընտրված Գրիգոր Ավալյանը մանդատից հրաժարվելու դիմում է ներկայացրել: Նշենք, որ նա շարժմանը միանալու մասին հայտարարած «Գրանդ Հոլդինգի» երկարամյա ֆինանսական տնօրենն էր: Ավալյանին, ամենայն հավանականությամբ, Ազգային ժողովում կփոխարինի Տավուշի մարզում առաջադրված հանրապետական մյուս թեկնածուն՝ Հակոբ Հակոբյանը:
Նիկոլ Փաշինյանի թեկնածության օգտին քվեարկելու մասին, այս անգամ՝ Ազգային ժողովի ամբիոնից հայտարարեցին «Ծառուկյան» եւ ՀՅԴ խորհրդարանական խմբակցությունները: Բայց այս դեպքում էլ անակնկալներ եղան: Դաշնակցական Աղվան Վարդանյանը հայտարարեց, որ չի կարող կողմ քվեարկել Փաշինյանի թեկնածությանը: Դաշնակցության համար սա, պարզվում է, անակնկալ էր: Կուսակցության Հայաստանի Գերագույն մարմինն արդեն Աղվան Վարդանյանից պահանջել է վաղաժամ վայր դնել մանդատը:
«Ծառուկյան» դաշինքում նման անակնկալներ չեղան, սակայն խմբակցության պատգամավորներ Իշխան Զաքարյանն ու Մելիք Մանուկյանը ներկա չէին նիստին:
Ազգային ժողովը վարչապետի նոր ընտրություն կանցկացնի 7 օր անց՝ մայիսի 8-ին: Այս անգամ, սակայն, վարչապետի թեկնածուները պետք է առաջադրվեն պատգամավորների ընդհանուր թվի առնվազն 1/3-ի կողմից: Եթե այս դեպքում էլ չհաջողվի վարչապետ ընտրել, ԱԺ-ն օրենքի ուժով կցրվի:
Իսկ Նիկոլ Փաշինյանի քվեարկությունից հետո շտապել է Հանրապետության հրապարակ, որը վաղ առավոտից բազմամարդ էր:
Արցախի պաշտպանության նախարարությունը հայտնում է առաջնագծում հակառակորդի զինտեխնիկայի եւ կենդանի ուժի հերթական կուտակումների ու տեղաշարժերի մասին: Պաշտպանության բանակը նաեւ շփման գծում տիրող իրադրությունը ներկայացնող տեսանյութ է հրապարակել: Գերատեսչության տեղեկացմամբ՝ ապրիլի 30-ից սկսված տեղաշարժերը շարունակվել են նաեւ այսօր: Հանգստյան օրերին, սակայն, արցախա-ադրբեջանական շփման գծում իրավիճակը հարաբերական հանգիստ է եղել:
Ազգային անվտանգության ծառայությունը խոշոր չափերով թմրանյութերի մաքսանենգության դեպք է բացահայտել. գործով 3 ձերբակալված կա: ԱԱԾ-ի տվյալներով՝ Իրանի քաղաքացիները՝ ամուսիններ Ա.Ա-ն եւ Շ.Շ-ն նախնական համաձայնություն են ձեռք բերել Իրանի մեկ այլ քաղաքացի, Հայաստանում բնակվող Ս.Բ.-ի հետ եւ Իրանում ապօրինի ճանապարհով խոշոր չափերով ափիոն, մետամֆետամին եւ հերոին են ձեռք բերել: Նրանք փորձել են թմրամիջոցները Հայաստան ներմուծել ապրիլի 29-ին Թեհրան-Երեւան չվերթով: Ազգային անվտանգության ծառայության աշխատակիցները նրանց բերման են ենթարկել պատվիրատուի հետ հանդիպման գնալու ճանապարհին: Քրեական գործ է հարուցվել: Երեք կասկածյալներն էլ ձերբակալվել են:
Լոռու մարզում ողբերգական ավտովթար է տեղի ունեցել. 3 զոհ եւ 4 վիրավոր կա: Կեսգիշերն անց Վանաձոր-Դիլիջան ավտոճանապարհին բախվել են BMW եւ «ՎԱԶ-2106» մակնիշի մեքենաները, ինչի հետեւանքով վերջինը կողաշրջվել է: «ՎԱԶ-2106»-ից դուրս են բերել Գեղարքունիքի մարզի Ծովագյուղի բնակիչներ 21-ամյա Թաթուլ Ֆերոյանի, 18-ամյա Գրիշա Մովսիսյանի, 18-ամյա Նարեկ Ամիրխանյանի դիերը: «ՎԱԶ-2106»-ի մյուս ուղեւորները՝ նույն գյուղի բնակիչներ 19-ամյա Սամվել Սանեյանը, 20-ամյա Ռազմիկ Մարգարյանը, 18-ամյա Մուշեղ Մարգարյանը, ինչպես նաեւ BMW-ի վարորդը՝ 45-ամյա Ալեքսան Վարդանյանը մարմնական վնասվածքներով հիվանդանոց են տեղափոխվել:
Մայիսի 2-ին եւ 3-ի գիշերը հանրապետությունում սպասվում է առանց տեղումների եղանակ: Օդի ջերմաստիճանը 3-5 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +10+12, ցերեկը՝ +22+24 աստիճան տաքություն: