HSBC բանկի մահացած անվտանգության աշխատակիցը 45-ամյա Խաչատուր Գալստյանն է: Այս մասին NEWS.am-ին հայտնեցին «Արմոբիլ» ընկերությունից:
Խաչատուր Գալստյանը ընկերությունում աշխատում էր 2016 թվականից:
Վիրավորում ստացած մյուս աշխատակիցը Եղվարդի բնակիչ 25-ամյա Արամ Մկրտչյանն է: Նա ընկերությունում աշխատում էր 2015 թվականից: Նշենք, որ նա վիրավորում է ստացել կրծքավանդակի շրջանում եւ վիրահատվել է: Այս պահին նա գտնվում է «Գրիգոր Լուսավորիչ» ԲԿ-ի ինտենսիվ թերապիայի բաժնում:
Ավելի վաղ հայտնել էինք, որ հիվանդանոցում մահացել է նաեւ մյուս վիրավորը։ Ոստիկանության լրատվության վարչության պետ Աշոտ Ահարոնյանը հայտնել էր, թե ավագ ենթասպա Արա Շախգուլյանը, չնայած վիրահատությանն ու բժիշկների բոլոր ջանքերին, մահացել է։ Երկու երեխաների հայր, ՊՊԾ ջոկի հրամանատարը համակարգում էր 2000 թվականից։
Ավելի վաղ ոստիկանությունը հայտնել էր, որ մայիսի 3-ին, ժամը 14.25-ի սահմաններում ոստիկանություն ահազանգ է ստացվել, որ HSBC բանկի` Կոմիտասի պողոտա-Գյուլբենկյան փողոց խաչմերուկում գտնվող մասնաճյուղի վրա ավազակային հարձակում է կատարվել: Պարզվել է, որ հանցագործություն կատարած անձը Ճանապարհային ոստիկանության տեսանկարահանման միջոցով հայտնաբերված խախտումների արձանագրման կենտրոնի պետ, ոստիկանության գնդապետ Դանիել Դանիելյանն է: