«ԳեոՊրոՄայնինգ Գոլդ» ընկերության Արարատի ոսկու կորզման գործարանի աշխատակիցներն այսօր՝ մայիսի 15-ին գործադուլ են հայտարարել. նրանք պահանջում են աշխատավարձերի բարձրացում եւ աշխատակիցներին սոցփաթեթների տրամադրում:
Ավելի ուշ հայտնի դարձավ, որ գործարանի ղեկավարությունը աշխատակիցների հետ բանակցությունների արդյունքում որոշել է բարձրացնել աշխատավարձերը: Աշխատակիցների խոսքով, իրենց ասել են, որ մինչեւ 150 000 դրամ աշխատավարձ ստացողների աշխատավարձը երեսուն տոկոս կբարձրացնեն, ավելի բարձր ստացողներինն ավելի քիչ տոկոսով: ըստ այդմ, նշվել է, որ հունիսի սկզբին Արարատի ոսկու կորզման գործարանի աշխատակիցների հետ նախատեսվում է նոր պայմանագրերի կնքում, այդ ժամանակ էլ կբարձրացվեն աշխատավարձերը:
Ի դեպ, այսօր՝ մայիսի 15-ին, գործադուլ են հայտարարել նաեւ Ագարակի պղնձամոլիբդենային կոմբինատի աշխատակիցները, որոնք եւս պահանջում են աշխատավարձի բարձրացում։
Կոմբինատի ղեկավարության կողմից ներկայացած մի քաղաքացի գործադուլավորների հավատացրել է, որ ղեկավարությունը 2 շաբաթ ժամանակ է խնդրում խնդիրը լուծելու համար:
