«Հասկանում եմ քննադատությունները, խնդիրների մատնանշումը, բայց անհասկանալի է ատելության այն քարոզը, որով ուղեկցվում են այդ մտահոգությունները»։ Այս մասին այսօր՝ հունիսի 12-ին լրագրողների հետ հանդիպմանը հայտարարեց Մայր աթոռի դիվանապետ Արշակ եպիսկոպոս Խաչատրյանը՝ մեկնաբանելով կաթողիկոսի դեմ կազմակերպվող բողոքի ակցիաները։

«Ես չեմ կարող ընդունել Ամենայն հայոց կաթողիկոսին սատանա անվանելը, ինձ համար անհասկանալի է՝ ինչպես կարելի է սատանա անվանել Ամենայն հայոց կաթողիկոսին, КГБ-ի գործակալ անվանել Վազգեն Առաջին հայրապետին, պղծել Վազգեն Սարգսյանի ու Հոկտեմբեր 27-ի զոհերի հիշատակը, նրանց նկատատմամբ ոճրագործություն անվանել Սուրբ հոգու պատիժ։ Չէ՞ որ Վագեն կաթողիկոսի, Գարեգին կաթողիկոսի, Գարեգին 2-րդ կաթողիկոսի կողմից հավատացյալներ են օրհնվել, ի՞նչ է այդ մարդիկ բոլորը պիղծ են»,–նշեց նա։

Այս վարքագիծը, Մայր աթոռի դիվանապետի համոզմամբ, բնորոշ է թուրքերին. «Ի՞նչ է թուրքերին ենք ուրախացնում»։

Հայոց կաթողիկոսի անձի տարանջատումը Հայոց եկեղեցուց նա անթույլատրելի եւ անհեթեթ է որակել։

Արշակ եպիսկոպոս Խաչատրյանը նաեւ հորդորեց զերծ մնալ քաղաքական գործընթացներում օգտագործվող բառապաշարն ու հռետորաբանությունը եկեղեցական կյանք ներմուծելուց։