Հայաստանի Ազգային ժողովն այսօր՝ հունիսի 13-ին, շարունակում է իր աշխատանքը: Նշենք, որ նախօրեին պատգամավորները հասցրեցին քննարկել օրակարգում ընդգրկված 16 հարցերից 15-ը:
Այսօր խորհրդարանը ձեռնամուխ կլինի ՀՀ 2017 թվականի պետական բյուջեի կատարման տարեկան հաշվետվության քննարկմանը:
Նշենք, որ նախօրեին քննարկված օրինագծերի թվում էին Պետական գույքի մասնավորեցման 2017-2020 թվականների ծրագրի կատարման 2017 թվականի տարեկան հաշվետվությունը հաստատելու մասին, «Հանրակրթության մասին» ՀՀ օրենքում փոփոխություն կատարելու մասին, Սահմանադրական դատարանի դատավորի ընտրության հարցերը:
Այսօր՝ հունիսի 13-ին, ժամը 11.00-ից մինչեւ 11.40-ը ԱԺ նիստերի դահլիճին հարակից նախասրահում տեղի կունենա ՍԴ անդամի թեկնածու Ելիզավետա Դանեիլյանի ընտրության քվեարկությունը:
Նշենք, որ ՀՀ նախագահ Արմեն Սարգսյանը Սահմանադրական դատարանի թափուր տեղի համար առաջադրել էր Էմիլ Բաբայանի թեկնածությունը, որը սակայն ԱԺ-ն չհաստատեց՝ բավարար թվով ձայներ նրա օգտին չտալով:
Հիմա արդեն, Սահմանադրական դատարանի դատավորի թափուր տեղում ընտրելու համար առաջարկվել է ՀՀ դատավորների ընդհանուր ժողովի կողմից ընտրված՝ ՀՀ վճռաբեկ դատարանի քրեական պալատի դատավոր Ելիզավետա Ռեմիկի Դանիելյանի թեկնածությունը:
Նկատենք, որ ՍԴ անդամի թեկնածությունը ԱԺ-ում պետք է հաստատվի 3/5-րդով, այսինքն անհրաժեշտ է լինելու 63 կողմ ձայն:
ՍԴ անդամի ընտրության հարցը բավական երկար քննարկումների առիթ է տվել: Ավելի քան 200 փաստաբաններ նամակով դիմել են ՀՀ նախագահ Արմեն Սարգսյանին՝ առաջարկելով այդ պաշտոնի համար մրցույթ անցկացնել եւ նշել, որ իրենց նախընտրելի թեկնածուն փաստաբան Վահե Գրիգորյանն է: